Chandrashekhar Bawankule : जमीन व्यवहार प्रकरणात पार्थ पवारांवर गुन्हा का दाखल नाही? मंत्री बावनकुळेंनी सांगितली टेक्निकल गोष्ट

Nagpur News : पार्थ पवार यांची खरेदी केलेल्या जमिनवरून मोठा वाद निर्माण झाला आहे. विरोधकांनी उपमुख्यमंत्री अजित पवार यांच्या राजीनाम्याची मागणी केली आहे. मुख्यमंत्री देवेंद्र फडणवीस यांनी एकनाथ खडसे यांच्याबाबत निर्णय घेतला तोच अजित पवार यांच्याबाबत घ्यावा, अशी मागणी केली आहे. यामुळे महायुती सरकराची मोठी अडचण झाली आहे. यावर भाजपचे नेते आणि राज्याचे महसूलमंत्री चंद्रशेखर बावनकुळे यांनी जमिनीच्या रजिस्ट्रीमध्ये लिहून घेणारे आणि देणारे यांच्यावर गुन्हे दाखल करण्यात आले आहेत, त्यात पार्थ पवार यांचे नाव नसल्याचे स्पष्ट केले.

चौकशी समितीच्या अहवालात ज्या दोषींची नावे पुढे येतील त्यापैकी कोणालाही सोडणार असे अजित पवार यांनीच जाहीर केले आहे. या प्रकरणाची शंभर टक्के चौकशी होईल, असा दावाही बावनकुळे यांनी केला. शीतल तेजवाणी यांचेही नाव समोर आले आहे. यावर कोणाचा काय रोल आहे हे अहवाल आल्यावरच स्पष्ट होईल. अण्णा हजारे जे बोलले, विरोधक जे काही आरोप करीत आहे, मागणी करीत आहे, त्यावर चौकशी समितीचा अहवाल आल्यावर कारवाई केली जाईल, अशी ग्वाही चंद्रशेखर बावनकुळे (Chandrashekhar Bawankule ) यांनी दिली.

या संदर्भात महसूल खात्याचा प्राथमिक अहवाल आला आहे. त्या आधारे तहसीलदार, आमचा मुद्रांक अधिकारी, मुद्रांकाचे डॉक्युमेंट्स तयार करणारे, कंपनीचा मालक असेल खरेदी विक्री करणारे असतील, नोंदणीच्या वेळी ज्यांनी सही केल्या ते पहिल्या टप्प्यात जे आम्हाला आढळले त्यांच्यावर गुन्हे दाखल केले आहेत, असेही बावनकुळे यांनी स्पष्ट केले.

आता प्राथमिक चौकशीत जे दोषी दिसले त्या अधिकाऱ्यांवर निलंबनाची कारवाई आणि गुन्हे दाखल केले आहेत. याची सखोल चौकशी महसूल खाते करत आहे. मी महसूलमंत्री झालो तेव्हा 1992-93 पासून 13 हजार फाईल पेंडिग होत्या. 800 हियरिंग पूर्ण केल्या आणि 700ते 800 क्लोज फॉर ऑर्डर केले आहेत, असेही त्यांनी स्पष्ट केले.

पुढच्या तीन वर्षात महसूल खात्यातील संपूर्ण हिअरिंग संपल्या पाहिजे, असे आपले प्रयत्न आहेत. राज्यातील महायुती सरकारकडून व आम्ही प्रत्येक जिल्ह्यात लोक अदालत घेऊन त्याच स्तरावर प्रश्न सोडवण्याचे ठरवले असल्याचे बावनकुळे यांनी सांगितले.