Congress Protest News: ...अन् आंदोलनापूर्वीच दोन महिला काँग्रेस नेत्यांमध्ये जुंपली!

Nagpur News : बदलापूर घटनेचा निषेध नोंदवण्यासोबतच विधानसभेच्या निवडणुकीत महिलांना 33 टक्के आरक्षण देण्याच्या मागणीसाठी गुरुवारी( ता.29) आयोजित केलेल्या आंदोलनापूर्वीच महिला काँग्रेसच्या प्रदेशाध्यक्ष संध्या सव्वालाखे आणि शहर अध्यक्ष नंदा पराते यांच्यात जुंपली.

आंदोलनाची माहिती देताना संध्या सव्वालाखे यांनी महिला काँग्रेसमध्ये कुठलेचे मतभेद नाहीत, वाद नाहीत असा दावा पत्रकारपरिषदेत केला. त्यानंतर महिला काँग्रेसच्या शहराध्यक्ष नंदा पराते उपस्थित झाल्या. आपल्या शहरात काँग्रेसचे (Congress) एवढे मोठे आंदोलन असताना माहिती देण्यात आली नाही, कळवण्यात आले नाही असा आक्षेप त्यांनी माध्यमांसमोरच नोंदवला.

विधानसभेच्या निवडणुकीत महिलांना 33 टक्के आरक्षण देण्यासाठी संविधान चौकात राज्यव्यापी आंदोलन करण्याचा महिला काँग्रेसच्यावतीने नियोजित करण्यात आले होते. या आंदोलनात राष्ट्रीय प्रवक्त्या अलका लांबा यासुद्धा सहभागी होणार आहे. दरम्यान, महाराष्ट्रात बदलापूर (Badlapur) येथे मुलीवर झालेल्या अत्याचाराही या आंदोलना दरम्यान निषेध नोंदवण्याचा निर्णय महिला काँग्रेसच्यावतीने घेण्यात आला आहे.

संध्या सव्वालाखे यांनी पत्रकार परिषद घेऊन आंदोलनाची माहिती दिली. मात्र शहर महिला काँग्रेसच्या आजी-माजी अध्यक्ष नंदा पराते आणि नॅश अली पत्रकार परिषदेला उपस्थित का नाही असा सवाल त्यांना विचारण्यात आला. यावर सव्वालाखे यांनी सर्व पदाधिकारी आंदोलनाची तयारी करीत आहेत, निरोप देत आहे असे सांगितले. आमच्यात कुठलाही वाद नाही, मतभेद नाहीत असाही दावा त्यांनी यावेळी केला.

पत्रकार परिषद आटोपताच शहराध्यक्ष नंदा पराते दाखल झाल्या. त्यांना आंदोलनाच्या तयारीबाबत विचारणा केली असता आपणास आंदोलनाची माहितीच नसल्याचे सांगून त्यांनी प्रदेशाध्यक्षांनाच तोंडघशी पाडले. प्रदेशाध्यक्ष पत्रकार परिषद घेणार आहेत याची माहितीसुद्धा आपणास देण्यात आली नाही असेही नंदा पराते यांनी सांगितले. आपल्याला डावलले जात असल्याचा आरोपही त्यांनी यावेळी जाहीरपणे केला.