NCP SP's Mandal Yatra : भाजप प्रवेशाची चर्चा असलेल्या बड्या नेत्याची पवारांच्या राष्ट्रवादीच्या मंडल यात्रेला दांडी; चर्चेला उधाण

Nagpur, 09 August : राष्ट्रवादी काँग्रेस शरदचंद्र पवार पक्षाच्या वतीने राज्यात मंडल यात्रा काढण्यात येत आहे. क्रांती दिनाचे औचित्य साधून काढण्यात आलेल्या या मंडल यात्रेला ज्येष्ठ नेते शरद पवार यांनी नागपूरमध्ये हिरवा झेंडा दाखवला. या यात्रेच्या उद्‌घाटनाच्या कार्यक्रमाला प्रदेशाध्यक्ष शशिकांत शिंदे यांच्यासह पक्षाचे झाडून सारे नेते उपस्थित आहेत. मात्र, वरिष्ठ नेते आमदार जयंत पाटील यांनी या मंडल यात्रेला दांडी मारल्याचे दिसून येत आहे, त्यामुळे त्यांच्या नाराजीबाबत पुन्हा चर्चा सुरू झाली आहे.

क्रांती दिनाचे निमित्त साधून राष्ट्रवादी काँग्रेस शरदचंद्र पवार पक्षाकडून मंडल यात्रा काढण्याचा निर्णय पक्षाकडून घेण्यात आला आहे. महाराष्ट्रात मंडल आयोगाची अंमलबजावणी तत्कालीन मुख्यमंत्री शरद पवार (Sharad Pawar) यांनी केली होती. पवारांनी ओबीसींसाठी घेतलेल्या निर्णयाची माहिती व्हावी, यासाठी ही यात्रा काढण्यात येणार आहे. ही यात्रा पहिल्या टप्प्यात विदर्भातील अकरा जिल्ह्यांत फिरणार आहे.

या यात्रेला हिरवा झेंडा दाखवण्यासाठी खुद्द पक्षाध्यक्ष शरद पवार, प्रदेशाध्यक्ष शशिकांत शिंदे, आमदार जितेंद्र आव्हाड, रोहित पवार, माजी मंत्री अनिल देशमुख, माजी मंत्री राजेंद्र शिंगणे, माजी मंत्री हर्षवर्धन पाटील आणि विदर्भातील इतर सर्व प्रमुख नेते उपस्थित आहेत. मात्र, माजी प्रदेशाध्यक्ष जयंत पाटील (Jayant Patil) यांची गैरजहेरी प्रकर्षाने जाणवणारी आहे. त्या अनुपस्थितीबाबत वेगवेगळी चर्चा सुरू झाली आहे.

जयंत पाटील यांनी नुकतेच प्रदेशाध्यक्षपदाचा राजीनामा दिला आहे. मध्यंतरी रोहित पवार आणि त्यांच्या समर्थकांकडून प्रदेशाध्यक्षपदी नव्या रक्ताला संधी द्यावी, अशी मागणी केली होती. त्यानंतर पक्षात मोठे वादंग उठले होते. कारण जयंत पाटील यांनीही सभेत बरेच काही सुनावले होते. त्यानंतर पक्षातील वाद थंडावल्यानंतर काही दिवसांपूर्वी जयंत पाटील यांनी प्रदेशाध्यक्षपदाचा राजीनामा दिला आहे.

दरम्यान, विधानसभा निवडणुकीच्या निकालानंतर जयंत पाटील यांच्याबाबत वेगवेगळ्या चर्चा होत आहेत. विशेषतः त्यांच्या महाविद्यालयाच्या कार्यक्रमासाठी राष्ट्रवादी काँग्रेसच्या नेत्यांना डावलून त्यांनी केंद्रीय रस्ते वाहतूक मंत्री तथा भाजप नेते नितीन गडकरी यांना निमंत्रित केले होते. त्यावेळी जयंतरावांच्या भाजप प्रवेशाची चर्चा रंगली होती.

महायुतीकडून त्यांची मतदारसंघासह विविध ठिकाणी कोंडी करण्यात येत आहे. तसेच, राष्ट्रवादी काँग्रेस शरदचंद्र पवार पक्षाकडूनही त्यांच्याकडे बोट करण्यात येत आहे, त्यामुळे जयंत पाटील हे कोणता निर्णय घेणार याची चर्चा झडत असतानाच आज नागपुरातून सुरू होणाऱ्या मंडल यात्रेला जयंत पाटील यांची असलेली अनुपस्थिती बरेच काही सांगून जाणारी आहे.