Nagpur Election: भाजपचा बंडखोरांना मोठा झटका! तब्बल 32 जण एकाचवेळी निलंबित

Nagpur Election: महापालिकेच्या तिकिटासाठी भाजपच्या कार्यकर्त्यांमध्ये मोठी झुंबड उडाली होती. सुमारे दोन हजार जणांनी उमेदवारी मागितली होती यातून फक्त फक्त दीडशे जणांची निवड करताना नेत्यांची मोठी तारांबळ उडाली होती. नाराजी उद्‍भवणारच याची कल्पना आल्याने अर्ज भरेपर्यंत अधिकृत उमेदवारी नावे जाहीर करण्याचे भाजपने टाळले होते. त्यानंतरही अनेकांनी बंडाचे निशान फडकावले आहे. अशी एकूण ३२ जणांना भाजपने सहा वर्षांसाठी पक्षातून निलंबित करून मोठा झटका दिला आहे.

यात पाच वेळा नगरसेवक राहिलेले ज्येष्ठ नेते सुनील अग्रवाल, माजी नगरसेवक भगवान मेंढे, माजी नगरसेवक दीपक चौधरी, माजी महापौर अर्चना डेहनकर यांचे पती विनायक डेहनकर, माजी नगरसेविका नसिमाबानो आदींचा समावेश आहे. भाजपने निलंबनासह बंडखोरांना छुपी मदत करणारे, पक्ष विरोधी कारवाया करणाऱ्या कार्यकर्त्यांनाही कोणाची गय केली जाणार नाही असा इशारा दिला आहे. त्यामुळे तिकीट नाकारल्याने नाराज असलेले व विरोधकांना मदत करणारे कार्यकर्ते घाबरले आहेत. विशेष म्हणजे २०१७ च्या महापालिकेच्या निवडणुकीतही भाजपने अनेकांना निलंबित केले होते. वर्षभरानंतर सर्वांना पक्षात परत घेतले होते.

भाजपने निलंबित केलेल्यांमध्ये सुनीता महल्ले, देवराज वासनिक, नसिमाबानो, सचिन खोब्रागडे व सुरेश टेंभरे, महेन्द्र गुप्ता व पुष्पा किरपाने, रुणाल चौहान, सुनील अग्रवाल, विनायक डेहनकर, धीरज चव्हाण व अक्षय ठवकर, प्रकाश घाटे व पापा यादव, विशाल लारोकर, शुभम मौदेकर, सुलोचना कोवे व राकेश भनारकर, रविशंकर कुंभारे, दशरथ मस्के, आशिष भुते व नंदिनी भुते, टेकचंद सोनबोईर, नंदू अहिर, रेणू गेंडरे, शुभम पडोळे व राजू घोसे, सुनील मानापुरे, सोनाली घोडमारे, दीपक चौधरी, आसावरी कोठीवान व सुनील मानेकर यांचा समावेश आहे.

विशेष म्हणजे भाजपने पाच वर्षे निष्क्रिय राहिलेल्या नगरसेवकांचे तिकीट कापण्याचा इशारा यापूर्वीच दिला होता. तीन वर्षांच्या प्रशासकाच्या काळात आपले कार्यालय बंद करू नका, लोकांच्या संपर्कता राहा, त्यांच्या समस्या सोडवा अशा सूचनाही देण्यात आल्या होत्या. यावेळी उमेदवारी देताना भाजपने प्रत्येकाचा सर्वे केला होता. त्यातून उमेदवारांची निवड केली असल्याचा दावा भाजपचे शहराध्यक्ष दयाशंकर तिवारी यांनी केला आहे.