Sharad Pawar Politics : शरद पवारांची मोठी खेळी; राजेंद्र शिंगणेंना घरातूनच आव्हान देण्याची तयारी; पुतणी उतरणार मैदानात

Buldana, 06 August : राष्ट्रवादी काँग्रेस अजित पवार गटात असलेले डॉ. राजेंद्र शिंगणे यांच्या विरोधात ज्येष्ठ नेते शरद पवार यांनी आणखी एक मोठी खेळी खेळली असून डॉ. शिंगणे यांना घरातूनच आव्हान देण्याची तयारी चालवली आहे.

डॉ. शिंगणे यांची पुतणी गायत्री शिंगणे यांना पाठबळ देत विधानसभा निवडणुकीत आमदार शिंगणे यांना आव्हान देण्याचा डाव पवारांनी टाकला आहे. त्यामुळे सिंदखेडराजा मतदारसंघात आगामी विधानसभा निवडणुकीत शिंगणे विरुद्ध शिंगणे अशी लढाई पाहायला मिळू शकते.

डॉ. राजेंद्र शिंगणे (Dr. Rajendra Shingne ) हे एक सिंदखेडराजा मतदारसंघातून गेल्या 25 वर्षांपासून निवडून येत आहेत. राष्ट्रवादी काँग्रेसच्या माध्यमातून त्यांनी अनेक वर्षे मंत्रिपदावरही काम केले आहे. मात्र, त्या तुलनेत विकास कामे झाली नसल्याचा आरोप शिंगणे यांची पुतणी गायत्री शिंगणे (Gayatri Shingne) यांनी केला आहे. तसेच, मतदारसंघातील साखर कारखाना आणि सूत गिरणीही बंद पडली आहे.

राष्ट्रवादी काँग्रेसमध्ये फूट पडल्यानंतर डॉ. राजेंद्र शिंगणे हे अजित पवार गटात गेले. त्यामुळे शरद पवार गटाला गायत्री शिंगणे यांच्या रूपाने नेतृत्वासाठी एक तरुण चेहरा मिळाला आहे आणि त्या चेहऱ्याला आता पाठबळ देण्याचे धोरण शरद पवार गटाने हाती घेतले आहे, त्यातूनच शरद पवार गटाच्या जिल्हा कार्याध्यक्ष असलेल्या गायत्री शिंगणे यांनी आपल्या काकांच्या विरोधात विधानसभेसाठी रणशिंग पुंकण्याची तयारी चालवली आहे.

विधानसभा निवडणूक लढविण्यासंदर्भात शरद पवार गटाच्या जिल्हा कार्याध्यक्ष गायत्री शिंगणे म्हणाल्या, ज्येष्ठ नेते शरद पवार यांना मी आतापर्यंत दोन वेळा भेटले आहे, त्यांच्याकडून मला विधानसभा निवडणुकीसाठी पॉझिटिव्ह संदेश आलेला आहे, त्यामुळे आगामी विधानसभा निवडणुकीत सिंदखेडराजा मतदारसंघात शिंगणे विरुद्ध शिंगणे अशी लढाई होऊ शकते.

सिंदखेडराजा मतदारसंघातील लोकांनाही आता नवा चेहरा आणि नवीन नेतृत्व हवे आहे. मतदारसंघातील 50 ते 60 टक्के जनता माझ्या पाठीशी आहे. सिंदखेडराजा विधानसभा मतदारसंघातून आपल्याला शंभर टक्के विधानसभा निवडणूक लढवण्याची इच्छा आहे, असेही गायत्री शिंगणे यांनी या वेळी बोलताना सांगितले.