Assembly Election Strategy : फडणवीस ॲक्शन मोडवर; मुंबई-ठाण्यातील आमदारांसोबतच्या चर्चेतून ठरणार निवडणूक स्ट्रॅटेजी

Mumbai, 06 August : विधानसभा निवडणुकीच्या पार्श्वभूमीवर सर्वच राजकीय पक्ष तयारीला लागले आहेत. सत्ताधारी भारतीय जनता पक्षाने तर काही दिवसांपासून बैठका आणि अधिवेशनाच्या माध्यमातून निवडणुकीची पूर्वतयारीला सुरुवात केली आहे.

भाजपचे वरिष्ठ नेते तथा राज्याचे उपमुख्यमंत्री देवेंद्र फडणवीस हे ॲक्शन मोडवर आले असून ते आज मुंबई, ठाणे, नवी मुंबई आणि पालघर भागातील भाजप आमदारांसोबत चर्चा करणार आहेत.

गेल्या दोन दिवसांपासून उपमुख्यमंत्री फडणवीस हे निवडणुकीच्या अनुषंगाने आमदारांशी चर्चा करत आहेत. विदर्भ-मराठवाड्याचा आढावा घेतल्यानंतर देवेंद्र फडणवीस (Devendra Fadnavis) यांनी आज (ता. 06 ऑगस्ट) मुंबई महानगरातील आमदारांची बैठक बोलावली आहे. मुंबई महानगरातील भाजप आमदारांसोबत देवेंद्र फडणवीस आज चर्चा करणार आहेत.

देवेंद्र फडणवीस यांच्या मुंबईतील सागर निवासस्थानी आज रात्री आठ वाजता ही आमदारांची बैठक बोलावण्यात आली आहे. विधानसभा निवडणुकीच्या अनुषंगाने फडणवीस हे भाजप आमदारांशी चर्चा करून आढावा घेणार आहेत. या बैठकीला मुंबईबरोबरच, शेजारचे ठाणे, नवी मुंबई आणि पालघर मतदारसंघातील आमदारांसोबत फडणवीस हे संवाद साधणार आहेत.

काही दिवसांपूर्वी पुण्यात महाराष्ट्र प्रदेश भाजपचे विशेष अधिवेशन झाले होते. त्या अधिवेशनात केंद्रीय गृहमंत्री अमित शाह यांनी आक्रमक भाषण करत विधानसभा निवडणुकीसाठी आक्रमक भूमिका घेण्याचा सल्ला दिला होता. तसेच, उपमुख्यमंत्री फडणवीस यांनीही भाजप कार्यकर्त्यांना फेक नॅरेटिव्हच्या विरोधात आक्रमकपणे उत्तर देण्याचे आवाहन केले होते.

या अधिवेशनाशिवाय मुंबईत नेते आणि पदाधिकाऱ्यांच्या बैठकाही होत आहेत. त्यात निवडणूक स्ट्रॅटेजी ठरवली जात आहे. महायुती म्हणून भाजप शिवसेना अणि राष्ट्रवादी काँग्रेस अजित पवार गटाला सोबत घेऊन निवडणूक लढवणार आहे. मित्रपक्ष अजित पवार गटानेही राज्यात जनसन्मान यात्रा काढण्याचा निर्णय घेतला.

आगामी निवडणुकीच्या पार्श्वभूमीवर ही जनसन्मान यात्रा काढण्यात येत आहे. त्याची सुरुवात येत्या गुरुवारी (ता. 08 ऑगस्ट) नाशिक जिल्ह्यातील दिंडोरी येथून करण्यात येणार आहे. त्यामुळे मित्रपक्षासोबत भाजपही विधानसभा निवडणुकीच्या तयारीला लागला आहे.