Sunil Kedar controversy: शरद पवारांच्या राष्ट्रवादीला भीती काँग्रेसपेक्षा सुनील केदारांची

Nagpur News : नागपूर जिल्हा परिषदेची निवडणूक तोंडावर येऊन ठेपली आहे. विरोधक जोरदार कामाला लागले आहेत. मात्र महाविकास आघाडीबाबात कोणी बोलत नाही, चर्चाही करीत नाही असे सांगून शरदचंद्र पवार राष्ट्रवादी काँग्रेस पक्षाने आम्ही समविचारी पक्षासोबत आघाडी करतो, असे सांगून काँग्रेसला इशारा दिला आहे. मागील निवडणुकीत दिलेल्या धोक्याचाही उल्लेख राष्ट्रवादी काँग्रेसने आपल्या निवेदनात केला आहे. हे बघता राष्ट्रवादीला काँग्रेसपेक्षा सुनील केदार यांचीच अधिक भीती वाटत असल्याचे दिसते.

यापूर्वीच्या जिल्हा परिषदेची निवडणूक काँग्रेस (Congress) आणि राष्ट्रवादी काँग्रेसने एकत्र लढली होती. त्यानुसार जागा वाटप करण्यात आले होते. त्यानंतरही काही जिल्हा परिषद सर्कलमध्ये काँग्रेसने राष्ट्रवादीच्या विरोधात उमेदवार उभे केले होते. त्यामुळे राष्ट्रवादीची विजयी उमेदवारांची संख्या कमी झाले होती. या निवडणुकीत काँग्रेसचे 32 आणि राष्ट्रवादीचे आठ सदस्य निवडून आले होते. सत्ता स्थापनेच्यावेळी राष्ट्रवादीने उपाध्यक्षपदावर दावा केला होता. मात्र काँग्रेसने तो फेटाळून लावला होता. सुनील केदारांनी एकही सभापतिपद देणार नाही, असे राष्ट्रवादी काँग्रेसला ठणकावून सांगितले होते.

राष्ट्रवादीच्यावतीने खासदार प्रफुल पटेल यांना वाटाघाटी करायला यावे लागले होते. मात्र, केदार कोणालाच जुमानले नाहीत. शेवटी सुप्रिया सुळे यांचा फोन आल्यानंतर केदारांनी राष्ट्रवादीला एक सभापतिपद दिले. मात्र, माजी गृहमंत्री अनिल देशमुख (Anil Deshmukh) आणि माजी मंत्री रमेश बंग यांच्या समर्थकांना ते दिले नाही. राष्ट्रवादीतून निवडून आलेल्या उज्ज्वला बोढारे यांना महिला व बाल कल्याण सभापती देण्यात आले होते. त्या केदार यांच्याच समर्थक होत्या.

या निवडणुकीत अनिल देशमुख यांचे सुपुत्र सलील देशमुख आणि रमेश बंग यांचे सुपुत्र हेसुद्धा निवडून आले होते. मात्र पाच वर्ष जिल्हा परिषदेत या दोघांनाही काँग्रेसने पदाधिकारी होऊ दिले नाही. विधानसभेच्या निवडणुकीत केदार यांनी सलील देशमुख यांच्यासाठी प्रचार केला.

दुसरीकडे रमेश बंग यांच्यावर उमेदवारी मागे घेण्यासाठी दबाव टाकला होता. सध्याचे राजकारण बघता नागपूर जिल्हा परिषदेची निवडणूक केदार यांच्याच नेतृत्वात लढली जाणार आहे. त्यांच्या सांगण्यावरून काँग्रेसचे तिकीट वाटप होणार आहे. आघाडीसोबत लढलो तरी ते राष्ट्रवादीला फार काही जागा सोडणार नाहीत, याचीच भीती राष्ट्रवादीला सतावत असल्याचे त्यांच्या पत्रप्रपंचावरून दिसून येते.