Anand Dighe : मुख्यमंत्र्यांच्या ठाण्यातून आनंद दिघे यांचं अस्तित्व पुसण्याचं कटकारस्थान कुणाचं? केदार दिघे यांचा सवाल

Thane Political News :

मुख्यमंत्री एकनाथ शिंदे स्वत:ला आनंद दिघे यांचे शिष्य म्हणवून घेतात. तरीही जवळपास दीड वर्ष झालं तरी ठाण्यातील धर्मवीर आनंद दिघे प्रवेशद्वार उभारण्याकडे दुर्लक्ष केलं जात आहे. त्यामुळे ठाण्यातून दिघेसाहेबांचे अस्तित्व पुसण्याचं काम महापालिकेकडून होत असल्याचा आरोप ठाकरेंच्या शिवसेनेचे जिल्हाप्रमुख केदार दिघे यांनी केला आहे.

महापालिकेच्या माध्यमातून जरी हे काम होत असलं तरी यामागं कुणाचं अदृश्य हात आहेत आणि कुणाचं हित साधलं जातंय? असा सवाल करत त्यांनी शिवसेनेला डिवचण्याचा प्रयत्न केला आहे.

शिवसेनेचे दिवंगत ठाणे जिल्हाप्रमुख आनंद दिघे (Anand Dighe) यांच्या नावानं असलेलं प्रवेशद्वार वर्षभरापूर्वी महापालिकेनं काढलं. त्यानंतर वर्ष उलटूनही त्या ठिकाणी नव्यानं प्रवेशद्वार उभारण्याचं काम ठाणे महापालिका (Thane Municipal Corporation) करत नसल्यानं यामागं नेमका उद्देश काय असावा, असा सवाल केदार दिघे यांनी विचारला आहे. दिघे यांचं अस्तित्व ठाण्यातून पुसण्याचं काम कुणी करत आहे का, याचं उत्तर आता ठाणे महापालिकेनं द्यावे, असं आवाहनच केदार दिघे यांनी केलं आहे.

महापालिका प्रशासन ठाण्यात दिखाव्यासाठी वरवर रंगरंगोटी करत आहे, दीपस्तंभ उभे करत आहेत, मग आनंद दिघे यांच्या प्रवेशद्वाराचं (Dharmaveer Anand Dighe Praveshdwar) वावडं का, हे स्पष्ट करावं. खरंतर महापालिका प्रशासनानं तातडीनं दिघे यांच्या नावानं असणारं प्रवेशद्वार उभारायला हवं होतं. पण, या कामात होणारी दिरंगाई चिंताजनक आहे, असंही दिघे यांनी म्हटलं आहे.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

मुख्यमंत्री एकनाथ शिंदे (Eknath Shinde) हे स्वत:ला धर्मवीर आनंद दिघे यांचे शिष्य मानतात. त्यांच्या नावाचा गजर ते कायम करत असतात. असं असताना मुख्यमंत्र्यांच्या ठाण्यात (Thane) आणि आनंद दिघे यांच्या कर्मभूमीतच त्यांच्या नावाच्या प्रवेशद्वाराला होणारी दिरंगाई चर्चेचा विषय बनली आहे. त्यामुळे आतातरी धर्मवीर आनंद दिघे प्रवेशद्वाराच्या कामाला गती मिळणार, याची उत्सुकता ठाणेकरांना लागली आहे.

(Edited by Avinash Chandane)

R