Ashok Chavan : "चॅप्टर इज ओव्हर...", राहुल गांधींबाबत प्रश्न अन् अशोक चव्हाणांचं उत्तर

महाराष्ट्र काँग्रेसमधील ज्येष्ठ नेते आणि माजी मुख्यमंत्री अशोक चव्हाण ( Ashok Chavan ) यांनी सोमवारी ( 12 फेब्रुवारी ) पक्ष सदस्यत्वाचा आणि आमदारकीचा राजीनामा दिल्यानं राजकीय वर्तुळात एकच खळबळ उडाली. अशोक चव्हाण सतत भाजपत प्रवेश करणार असल्याची चर्चा होत होती. अखेर ते मंगळवारी ( 13 फेब्रुवारी ) भाजपत प्रवेश करणार आहेत. प्रवेशापूर्वी चव्हाणांनी प्रसारमाध्यमांशी संवाद साधला. या वेळी काँग्रेस नेते राहुल गांधी यांच्याबाबत एक प्रश्न विचारल्यावर अशोक चव्हाणांनी दिलेल्या उत्तराची चर्चा सुरू झाली आहे.

"आज माझ्या राजकीय आयुष्याची नव्यानं सुरुवात करत आहे. मी अधिकृतरित्या भाजपत प्रवेश करणार आहे. उपमुख्यमंत्री देवेंद्र फडणवीस, चंद्रशेखर बावनकुळे आणि आशिष शेलारांच्या उपस्थितीत भाजपत प्रवेश करेन. तेव्हा, अन्य जिल्ह्यांतील संभाव्य नेते भाजपत प्रवेश करू शकतात," असं अशोक चव्हाणांनी सांगितलं.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

राहुल गांधी किंवा अन्य नेत्यांनी तुमच्याशी संपर्क केला का? असा प्रश्न प्रसारमाध्यमाच्या प्रतिनिधीनं विचारला. त्यावर अशोक चव्हाण म्हणाले, "अब छोडीये... चॅप्टर इज ओव्हर... नई शुरुवात है..."

अशोक चव्हाणांना राज्यसभेची उमेदवारी?

अशोक चव्हाण यांनी भाजपत प्रवेश केल्यानंतर त्यांना राज्यसभेची उमेदवारी मिळण्याची शक्यता आहे. चव्हाणांच्या पक्ष प्रवेशानंतर भाजपकडून राज्यसभा उमेदवारांची यादी प्रसिद्ध केली जाईल. अशोक चव्हाणांबरोबर आज माजी आमदार अमर राजूरकर वगळता कुणीही विद्यमान आमदार भाजपत प्रवेश करणार नाही. मात्र, राज्यसभा निवडणुकीत भाजपनं चौथा उमेदवार उभा केल्यास चव्हाण गटातील काँग्रेस आमदारांकडून क्रॉस व्होटिंग होण्याची दाट शक्यता वर्तवण्यात येत आहे.

R