Doctor Assault Case : महिला डाॅक्टरला मारहाण, खासदार श्रीकांत शिंदेंनी मौन सोडले, म्हणाले,'राजकीय संरक्षण...'

KDMC News : कल्याण-डोंबिवली महानगरपालिकेच्या शास्त्रीनगर रुग्णालयातील डॉक्टर, परिचारिका आणि वैद्यकीय कर्मचाऱ्यांवर झालेल्या मारहाणीच्या घटनेने एकनाथ शिंदेंच्या शिवसेनेची मोठी राजकीय कोंडी केली आहे. या प्रकरणात शिंदेंच्या नगरसेवकाचे नाव समोर आल्यानंतर विरोधकांनी आक्रमक भूमिका घेतली आहे. या पार्श्वभूमीवर कल्याणचे खासदार डॉ. श्रीकांत शिंदे यांनी स्वतः पुढे येत दोषींना कोणतेही राजकीय संरक्षण मिळणार नसल्याचे स्पष्ट केले आहे.

सामाजिक माध्यमावरील आपल्या प्रतिक्रियेत डॉ. शिंदे यांनी डॉक्टरांवरील हल्ल्याचा तीव्र निषेध व्यक्त केला. डॉक्टर, परिचारिका आणि इतर वैद्यकीय कर्मचारी अत्यंत तणावपूर्ण परिस्थितीत रुग्णसेवा करत असून, त्यांच्यावर हात उचलणे कोणत्याही परिस्थितीत खपवून घेतले जाणार नाही, असे त्यांनी म्हटले.

या प्रकरणी गुन्हा दाखल झाला असून, कायदा हातात घेणाऱ्या कोणालाही माफी दिली जाणार नाही. दोषींवर कायद्यानुसार कठोर कारवाई केली जाईल, अशी भूमिका त्यांनी मांडली. त्याचबरोबर या घटनेत सहभागी असलेल्या कोणत्याही व्यक्तीला पक्ष पाठीशी घालणार नसल्याचे स्पष्ट करत, दोषी आढळल्यास त्यांच्यावर पक्षांतर्गत शिस्तभंगाची कारवाईही करण्यात येईल, असा इशाराही त्यांनी दिला.

लोकप्रतिनिधी आणि डॉक्टर या दोन्ही नात्याने आपण केडीएमसी रुग्णालयातील सर्व डॉक्टर, परिचारिका आणि वैद्यकीय कर्मचाऱ्यांच्या पाठीशी ठामपणे उभे असल्याचे डॉ. शिंदे यांनी नमूद केले.

राजकीय दृष्टिकोनातून निर्णय

या घटनेमुळे शिंदे गटावर राजकीय दबाव वाढल्याची चर्चा आहे. डॉक्टरांवरील हल्ल्यामुळे निर्माण झालेली नकारात्मक प्रतिमा दूर करण्यासाठी पक्ष नेतृत्वाने तत्काळ भूमिका स्पष्ट केल्याचे राजकीय जाणकारांचे मत आहे. आगामी स्थानिक राजकारणाच्या पार्श्वभूमीवर या प्रकरणाकडे केवळ कायदेशीर नव्हे, तर राजकीय दृष्टिकोनातूनही पाहिले जात आहे.