Sushma Andhare : मुख्यमंत्री पदासाठी महायुतीत गडी बादची स्पर्धा; अंधारेंचे राणे पिता-पुत्रावर जोरदार टीकास्त्र

Sindhudurg News : शिवसेना उद्धव बाळासाहेब ठाकरे पक्षाच्या उपनेत्या सुषमा अंधारे सिंधुदुर्ग दौऱ्यावर असतानाच नारायण राणे पिता-पुत्रासह महायुतीवर जोरदार निशाणा साधला.

"राणे भ्रमात आहे. भाजप त्यांचा गेम करत आहेत. गेम करायचा नसता, तर नीलेश यांना एकनाथ शिंदे यांच्या जवळ जायला दिले नसते. हा गेम सुरू असतानाच, मुख्यमंत्री पदासाठी एकनाथ शिंदे आणि देवेंद्र फडणवीस एकमेकांचे गडी बाद करत आहेत. नीतेश राणे आणि नीलेश राणे यांचा भाजपला गेम करायचा आहे आणि ते उदय सामंत यांना देखील आवडेल", अशी टोलेबाजी सुषमा अंधारे यांनी केली. अंधारे यांच्या या टीकेमुळे सिंधुदुर्गमधील महायुतीमध्ये अस्वस्थता पसरली आहे.

शिवसेना (Shivsena) ठाकरे पक्षाच्या उपनेत्या सुषमा अंधारे आज सिंधुदुर्ग दौऱ्यावर होत्या. इथं पत्रकारांशी संवाद साधताना त्यांनी महायुतीला चांगलेच डिवचले. यात सर्वाधिक त्यांनी राणे कुटुंबाला डिवचले. अंधारे म्हणाल्या, "नारायण राणेंचे दोन मुलं दोन मतदार संघात आमदारकीला उभी आहेत. तर स्वतः वडील खासदार आहेत. तिसरा मुलगा असता, तर त्याला नारायण राणेनी सावंतवाडीमध्ये उभ केले असते". त्यांना विकासाचा ध्यास आहे, त्यांना असं कोणतं पद मिळालं नाही की, ते विकास करू शकले नाहीत, असा टोला देखील लगावला.

'माणूस मुख्यमंत्री असताना विकास करू शकला नाही, तर अजून कोणतं पद पाहिजे होतं. अमेरिकेच्या राष्ट्राध्यक्ष पद ट्रम्प तात्याऐवजी नारायण राणेना (Narayan Rane) पद दिल पाहिजे होते. कोकणात दहशत आहे, ती दूर करण्यासाठी आम्हाला संधी हवी आहे. ही लढाई धनशक्तीविरुद्ध जनशक्ती अशी आहे', असेही सुषमा अंधारे म्हणाल्या.

'नीलेश राणे जेव्हा तोंड उघडतात, तेव्हा तेव्हा महाविकास आघाडीची मत वाढतात, ते आमचे स्टार प्रचारक होतात. एकनाथ शिंदेनी चित्रपट बनवले, त्यांनी धर्मवीर 3 काढावा आणि नीलेश राणेंची मुक्ताफळ दाखवावीत. बाळासाहेबांना खुनी आरोपी बोलणारे नीलेश राणे हे शिंदेना चालतील का? शिंदे यांनी नीलेश राणेच्या वक्तव्याबाबत प्रचार सभेत बोलवं', असे आव्हान देखील सुषमा अंधारे यांनी दिले. 'राणेंनी कोकण कायम लुटून खाण्याचा प्रयत्न केला. राणेंना पाडण्यासाठी भाजप प्रयत्नशील आहे. फडणवीस यांची ध्वनीफित फिरतेय, त्यावरून ते समजतं, कोकणातील सर्व जागा महाविकास आघाडी जिंकणार, असे म्हणत खुद्दारीविरुद्ध गद्दारी', अशी लढत आहे, असे अंधारे यांनी म्हटले.

'नीतेश राणे भ्रमात आहात असून त्यांनी जागे व्हावं, भाजपला राणेंचा गेम करायचा आहे. जर गेम करायचा नसता, तर एकनाथ शिंदे यांच्याजवळ नीलेश यांना जायला दिले नसते, असा टोला लगावत मुख्यमंत्री पदावरून महायुतीत चाललेल्या कुरघोड्यांवर सुषमा अंधारे यांनी निशाणा साधला.

सुषमा अंधारे म्हणाल्या, मुख्यमंत्री पदासाठी एकनाथ शिंदे आणि देवेंद्र फडणवीस एकमेकांचे गडी बाद करत आहेत. नीतेश राणे आणि नीलेश राणे यांचा भाजपला गेम करायचा आहे आणि ते उदय सामंत यांना देखील आवडेल. अशा परिस्थितीत वैभव नाईक कोकण फार चांगलं हॅन्डल करू शकतात, असा विश्वास देखील अंधारे यांनी व्यक्त केला.