Maharashtra Cabinet Expansion : मंत्रिपदाचा तिढा पुन्हा दिल्ली दरबारी! मोदी-शहांच्या भेटीनंतर मोठा निर्णय होणार?

Mumbai News : महाराष्ट्रात फडणवीस सरकार स्थापन होऊन आठवडा होत आहे. पण अद्याप खातेवाटप झालेले नाही. येत्या 14 तारखेला मंत्रिमंडळ विस्तार होणार असल्याचे समजते. पण गृहमंत्रिपदासह आणखी काही महत्वाच्या पदावरुन भाजप आणि शिवसेना यांच्यातील पेच अद्याप सुटलेला नाही. त्यामुळे दोन्ही पक्षातील नेते आपल्याला कुठले मंत्रिपद मिळेल याबाबत अस्वस्थ आहेत.

मोठी खाती मिळण्यासाठी शिवसेना आग्रही आहे. गृहमंत्रिपदावर शिवसेनेचा डोळा आहे. पण या खात्यावर भाजपचा आपला दावा कायम आहे. मंत्रिमंडळ विस्तारावरुन अनेकजण गॅसवर असल्याचे चित्र आहे. विशेषत: शिवसेनेतील नेत्यांमध्ये अद्यापही अस्वस्थता कायम आहे. देवेंद्र फडणवीस, एकनाथ शिंदे, अजित पवार आज दिल्लीला जाणार आहेत.

गृहमंत्री पदावरुन शिवसेना आणि भाजपमध्ये अजूनही घोडं अडल्याची माहिती आहे. काल (मंगळवारी) उपमुख्यमंत्री एकनाथ शिंदे हे ठाण्यात होते, तर मुख्यमंत्री देवेंद्र फडणवीस हे मुंबईत होते. मंत्रिमंडळ विस्ताराला दोन दिवस शिल्लक असताना गृहमंत्रीपदाबाबत दोन्ही नेत्यांमध्ये चर्चा झाली पण निर्णय झाला नसल्याचे विश्वसनीय सुत्रांनी सांगितले.गृहमंत्रिपदावर शिवसेनेने आपला दावा कायम ठेवला आहे. भाजप शिवसेनेला गृहमंत्रिपद देण्यास तयार नसल्याचे समजते.

राज्याचे तीन दिवसाचे विशेष अधिवेशन नुकतेच झाले. अधिवेशन संपल्यानंतर महायुतीच्या तीनही प्रमुख नेत्यांची बैठकत होऊन खाते वाटपाचा तिढा सुटेल, अशी आशा होती, मात्र तसे झाले नाही. विशेष अधिवेशन संपल्यानंतर मंत्रिमंडळ विस्ताराबाबत बैठक झाली नाही.

मुख्यमंत्री देवेंद्र फडणवीस आणि भाजपचे प्रदेशाध्यक्ष चंद्रशेखर बावनकुळे हे आज दिल्लीला जाण्याची शक्यता आहे. ते केंद्रीय गृहमंत्री अमित शाह यांच्याशी चर्चा करतील, अशी माहिती सूत्रांनी दिली. भाजप मंत्र्यांच्या यादीला पक्ष नेतृत्वाची मंजुरी घेण्यासाठी दोघे जाणार असल्याचे समजते.