KDMC Mayor : पहिला महापौर करण्याची संधी मनसेने गमावली! 'ती' एक चूक महागात पडली!

Kalyan-Dombivli News : महापौर आरक्षणाच्या सोडतीनंतर मनसेने महापौर बनवण्याची संधी सोडल्याची चर्चा आहे. कारण कल्याण डोंबिवलीमध्ये एसटी प्रवर्गासाठी महापौर पद आरक्षित झाले आहे. मात्र, आरक्षणापूर्वीच मनसेने शिंदेंच्या शिवसेनेला पाठींबा देऊन ही संधी गमावल्याची चर्चा आहे.

भाजप आणि एकनाथ शिंदेंच्या रस्सीखेचमध्ये मनसेने एकनाथ शिंदेंच्या शिवसेनेसोबत गट स्थापन करून शिंदेंना पाठींबा दिला. गट स्थापनापूर्वी मनसेने जर महापौर पदाचा शब्द घेतला असता तर त्यांचा आता महापौर होऊ शकला असता. कारण एसटीच्या केवळ तीन विजयी उमदेवार असून दोन शिंदेंच्या शिवसेनेत तर एक मनसेसोबत आहे. मनसेच्या शीतल मंढारी या एसटी आरक्षित जागेवरून विजयी झाल्या आहेत.

किरण भांगले हे शिवसेना शिंदे गटाचे नवनिर्वाचित नगरसेवक असून ते प्रथमच निवडणुकीत उतरले होते.तर, हर्षाली थवील या अनुभवी नगरसेविका असून पालिकेच्या कामकाजाचा त्यांना मोठा अनुभव आहे. महिला महापौर म्हणून त्यांना संधी दिली जाणार का, याकडे लक्ष आहे.

इच्छुकांमध्ये नाराज...

पाच वर्षाच्या कालावधीनंतर पालिकेत निवडणुका होत असल्याने व सत्तेची गणिते पाहता अनेकांनी पक्षांतर करत आपले वजन वाढवले होते. तसेच महापौर पदाच्या अपेक्षा ही बाळगल्या होत्या. खुल्या प्रवर्गाचे आरक्षण पडेल अशी आशा असल्याने दोन्ही पक्षातील मातब्बरांनी आपली मोर्चेबांधणी वरिष्ठांकडे करुन ठेवल्याची चर्चा राजकीय वर्तुळात आहे. यामध्ये भाजपाचे दिपेश म्हात्रे, मंदार हळबे, राहूल दामले, मोरेश्वर भोईर शिंदे सेनेचे सचिन पोटे, रमेश जाधव, रमेश सुकऱ्या म्हात्रे, विकास म्हात्रे, महेश गायकवाड, निलेश शिंदे यांची नावे प्रामुख्याने चर्चेत होती. मात्र एसटी आरक्षण पडल्याने या गुडघ्याला बाशिंग बांधून बसलेल्या इच्छुक नगरसेवकांचा भ्रम निरास झाला आहे.

कल्याणला महापौरची संधी...

केडीएमसीच्या महापौर पदाच्या शर्यतीत मागील वर्षी डोंबिवलीला संधी मिळाली होती. यंदा देखील ही संधी डोंबिवलीला मिळते की कल्याणला जाते याविषयी अनेक आराखडे बांधले जात होते. मात्र डोंबिवलीतून एकही उमेदवार एसटी प्रवर्गातील नसल्याने ही संधी कल्याणला मिळाली आहे. यातही महिलांची नगरसेवकांची संख्या दोन असून एक पुरुष नगरसेवक आहे. त्यामुळे नक्की कोणाच्या गळ्यात महापौरपदाची माळ पडणार याची उत्सुकता आहे.