Kishori Pednekar : उद्धव ठाकरेंची रणरागिणीकडे मोठी जबाबदारी; मुंबई महापालिकेत बलाढ्य भाजप अन् शिंदेंच्या शिवसेनेला भिडणार!

Mumbai News : मुंबई महापालिकेत बलाढ्य भाजपला नाकीनऊ आणण्यासाठी शिवसेना उद्धव बाळासाहेब ठाकरे पक्षाकडून माजी महापौर आणि विद्यमान गटनेत्या किशोरी पेडणेकर यांच्याकडे मोठी जबाबदारी देण्यात आली आहे. महापालिकेच्या विरोधी पक्षनेत्या म्हणून किशोरी पेडणेकर यांच्या नावाची अधिकृत घोषणा सोमवारी (16 फेब्रुवारी) सभागृहात करण्यात आली. अनुभवी, आक्रमक, मुलूख मैदानी तोफ अशी पेडणेकर यांची ओळख आहे.

नुकत्याच पार पडलेल्या मुंबई महापालिकेच्या निवडणुकीत महायुतीला मोठे यश मिळाले. त्यानंतर महापालिकेच्या महापौरपदी 25 वर्षानंतर पहिल्यांदाच भाजपच्या रितू तावडे या महापौर झाल्या आहेत तर उपमहापौरपदी एकनाथ शिंदे (Eknath Shinde) यांच्या शिवसेनेचे संजय घाडी यांची निवड झाली. त्यानंतर सोमवारी स्थायी समितीच्या सदस्यांची घोषणा करण्यासाठी महापालिकेची सभा पार पडली.

यावेळी महापौर रितू तावडे यांना सभागृहात येण्यास उशीर लागल्याने उद्धव ठाकरे यांच्या शिवसेनेच्या नगरसेवकांनी जोरदार घोषणाबाजी केली. त्यातच सभागृहाचे कामकाज सुरु झाल्यानंतर उद्धव ठाकरे यांच्या शिवसेनेच्या रणरागिणी किशोरी पेडणेकर यांच्यावर आता मोठी जबाबदारी सोपविण्यात आली आहे. त्यानंतर मुंबई महापालिकेच्या विरोधी पक्षनेता म्हणून किशोरी पेडणेकर यांच्या नावाची अधिकृत घोषणा करण्यात आली.

त्यांच्या नावाची घोषणा झाल्यानंतर सभागृहात एकनाथ शिंदे यांच्या शिवसेनेच्या (Shivsena) सभागृह नेतेपदी अमेय घोले यांची निवड करण्यात आली. ही घोषणा होताच ठाकरे यांच्या शिवसेनेच्या नगरसेवकांनी सभागृहातच ५० खोकेच्या घोषणा दिल्या. किशोरी पेडणेकर गेल्या टर्ममध्ये मुंबई महापालिकेच्या महापौर होत्या. त्यामुळे पुन्हा एकदा त्यांच्यावर उद्धव ठाकरे यांनी विश्वास दाखवत मोठी जबाबदारी दिली आहे. महापालिकेच्या विरोधी पक्षनेत्या म्हणून किशोरी पेडणेकर यांच्या नावाची अधिकृत घोषणा सोमवारी सभागृहात करण्यात आली.