Chavan-Shinde Politics : निवडणुकीपुरता वाद, हम साथ-साथ; एकनाथ शिंदे-रवींद्र चव्हाण एकत्र येणार?

Eknath Shinde News : नगरपंचायत आणि नगरपरिषद निवडणुकीमुळे भाजप आणि शिवसेनेत वाद निर्माण झाल्याचे चित्र आहे. भाजप प्रदेशाध्यक्ष रवींद्र चव्हाण यांच्या पुढाकाराने कल्याण डोंबिवलीत एकनाथ शिंदेंच्या शिवसेनेला सुरुंग लावला आहे. त्यामुळे चव्हाण यांच्या विरोधात शिवसेनेचे पदाधिकारी देखील आक्रमक झाले आहेत. मात्र, हा शिंदे आणि रवींद्र चव्हाण यांच्यातील वाद निवडणुकीपुरताच होता की काय असे चित्र निर्माण झाले आहे.

डोंबिवली मधील विकास कामाचे उद्घाटन आज उपमुख्यमंत्री एकनाथ शिंदे यांच्या हस्ते होणार आहे. विशेष म्हणजे या कार्यक्रमला रवींद्र चव्हाण यांना सुद्धा आमंत्रण देण्यात आले आहे. त्यामुळे शिंदे आणि चव्हाण एकत्र येत एकाच व्यासपीठावर दिसतील अशी चर्चा सुरू आहे.

फोडाफोडीच्या राजकारणामुळे चव्हाण यांच्या विरोधात शिवसैनिकांमध्ये असंतोष आहे. शिवसेनेच्या पदाधिकाऱ्यांनी पत्रकार परिषद घेत चव्हाण यांना इशारा देखील दिला होता. चव्हाण यांनी त्याला काही प्रत्युत्तर दिले नव्हते. त्यामुळे ते एकनाथ शिंदेंच्या कार्यक्रमाला हजेरी लावणार की नाही याबाबत उलट सुलट चर्चा सुरू होत्या.

...युती भक्कम

रवींद्र चव्हाण यांनी दोन तारखेपर्यंत युती टिकवण्याची जबाबदारी माझ्यावर आहे, असे वक्तव्य केले होते. दोन तारखेनंतर महसूल मंत्री चंद्रशेखर बावनकुळे यांनी युती मजबूत असून युतीमध्ये कोणताही वाद नाही, असे वक्तव्य केले होते. तसेच चव्हाण यांनी स्थानिक पातळीच्या युतीसंदर्भात वक्तव्य केले होते त्याचा चुकीचा अर्थ काढला गेला, असे म्हटले आहे.