Shivsen Vs MNS : सेटलमेंट कोण कोणाशी करतंय, हे जनतेला माहिती आहे; सुनील प्रभूंचा राज ठाकरेंवर निशाणा

Mumbai News : शिवसेनेने काढलेला मोर्चा हा सेटलमेंट वैगेरे काही नाही. आम्हाला मुंबई वाचवायची आहे. मुंबई ही अदानींच्या घशात घालण्याचे काम भारतीय जनता पक्षाचे लोक करत आहेत. त्यामुळे सेटलमेंटची भाषा चुकीची आहे. महाराष्ट्राची जनता एवढी सुज्ञ आहे की, त्यांना चांगलं कळतं की सेटलमेंट कोण कोणाशी करतं, असं सांगून शिवसेना आमदार सुनील प्रभू यांनी राज ठाकरेंवर निशाणा साधला. (Shiv Sena MLA Sunil Prabhu's reply to Raj Thackeray's allegation)

शिवसेनेचा मोर्चा हा सेटलमेंटल पॉवर वाढविण्यासाठी काढला होता, असा आरोप राज ठाकरे यांनी केला होता. त्याला आमदार सुनील प्रभू यांनी उत्तर दिलं. ते म्हणाले की, आमच्यावर सेटलमेंटचा आरोप करणे चुकीचे आहे. मुंबई ही अदानींच्या घशात घालण्याचे काम भारतीय जनता पक्षाचे लोक करत आहेत. ज्या दिवशी देवेंद्र फडणवीस यांनी गृहनिर्माण मंत्रीपद सोडले, त्याच दिवशी त्यांनी धारावी पुनर्विकासासाठी अदानींना देण्याचा अध्यादेश काढण्यात आला आहे, हे जगजाहीर आहे. या सर्व पापाचा वाटेकरी हा भारतीय जनता पक्ष आहे.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

धारावीच्या पुनर्विकासाचा अध्यादेश आल्यानंतर कळू शकतं की धारावीत काय होतंय. त्या अध्यादेशात संपूर्ण अधिकार हे अदानीला आणि अव्वाच्या सव्वा टीडीआर हा अदानीला दिला असेल. तसेच, मुंबईतील प्रत्येक नागरिकाला पहिला टीडीआर घेण्यासाठी अदानीकडे जावे लागत असेल तर हा मुंबईला वेठीला धरण्याचा प्रकार होता. त्यामुळे शिवसेनेने आता हा मोर्चा काढला आहे, असा उत्तर सुनील प्रभू यांनी राज ठाकरेंना दिले.

शिवसेनेचा विरोध अदानीला आणि विकासाला नाही. सरकारने घेतलेल्या धोरणाला आहे. धारावीच्या पुनर्विकासाबाबत सरकारने तयार केलेले धोरण चुकीचे आहे. त्यामुळे एकाच व्यक्तीच्या घशात धारावीचा पुनर्विकासाचा प्रकल्प घालायचा. धारावीतील मूळ नागरिकांना त्या ठिकाणाहून दूर न्यायचं. त्यांना पाचशे फुटाचं घर द्यायचं नाही. सरकारने हे करायचे नाही आणि एकाच माणसाला गडगंज श्रीमंत करण्याच्या दृष्टीने हा सर्व प्रकार चाललेला आहे, असा आरोपही सुनील प्रभू यांनी केला.

ते म्हणाल की, महाराष्ट्र नवनिर्माण सेनेचे प्रमुख राज ठाकरे कुणाची भाषा करत आहेत, हे त्यांना माहिती. तसेच, सेटलमेंटची भाषा कोण करतंय, हे जनता ठरवेल.