Shivsena Dasara Melava: 'गट प्रमुख' नाही 'कट प्रमुख'! एकनाथ शिंदेंनी उद्धव ठाकरेंवर डागली तोफ; सगळंच काढलं

Shivsena Dasara Melava 2025: शिवसेनेच्या दसरा मेळाव्यात उपमुख्यमंत्री एकनाथ शिंदे यांनी आज उद्धव ठाकरे यांनाच एकमेव टार्गेट केलं. शिवसेना का फुटली? इथपासून मुंबई महापालिका निवडणुकीपर्यंत अनेक मुद्द्यांवर आणि टीका-टिप्पण्यांवर त्यांनी भाष्य केलं. यावेळी उद्धव ठाकरेंचा उल्लेख त्यांनी 'पक्ष प्रमुख' नव्हे तर 'कट प्रमुख' असा केला. पण नेमकं शिंदे काय म्हणाले? ऐकुयात.

एकनाथ शिंदे म्हणाले, बाळासाहेबांनी काँग्रेसी पंचसुत्री गाडून टाकायचं म्हटलं होतं. पण ते गाडायचं सोडून तुम्ही डोक्यावर घेतलं हे तुमचं हिंदुत्व आहे. जेव्हा मुख्यमंत्र्यांची खुर्ची तुम्हाला पाहिजे होती तेव्हा बाळासाहेबांचे विचार तुम्ही सोडले, त्यांचे विचार विसरले. आता बाळासाहेबांचा विचार तुम्हाला यायला लागला? हे सगळं तुम्ही एका खुर्चीसाठी घालवलं. पक्षाचा प्रमुख पक्षातले लोक घालवण्यासाठी कधी कारस्थान करतो? रामदास कदम यांनी याची उदाहरणं सांगितलेली आहेत. मी पुन्हा ती सांगणार नाही. याला संपव त्याला संपव, त्याला संपव. हे पक्ष प्रमुख नाहीत हे कारस्थान करणारे कट प्रमुख आहेत. गट प्रमुख नाही कट प्रमुख! म्हणून ही परिस्थिती झाली.

आम्हाला गेला तो कचरा म्हणता! पण कधी आत्मपरीक्षण करणार आहात की नाही? हे लोक का जातात? कशासाठी? यात कोणाची चूक आहे. हजारो लाखो लोक चुकीचे आणि एक माणूस बरोबर? असं कसं होईल. जगात असा कुठल्याही पक्षाचा प्रमुख अध्यक्ष नसेल की जो स्वतःच्याच पक्षातील लोकांना संपवण्याची भूमिका घेणारा असेल. आज आठवा बाळासाहेब असताना किती मोठे नेते बसायचे सोबत, ते वैभव आठवा. आता काय परिस्थिती आहे? याला जबाबदार कोण?

आता स्थानिक स्वराज्य संस्थांच्या निवडणुका झाल्यानंतरही त्यांची सावली देखील त्यांच्यासोबत राहील की नाही? शिवसैनिक तर सोडा, अशा शब्दांत यावेळी एकनाथ शिंदे यांनी दसरा मेळाव्यात ठाकरेंवर तोफ डागली.