Uddhav Thackeray : वसंत मोरे, चंद्रहार पाटील अन् वरूण सरदेसाई यांच्यावर ठाकरे गटात मोठी जबाबदारी

Maharashtra Politics: विधानसभा निवडणुकीच्या पार्श्वभूमीवर शिवसेना ( ठाकरे गट ) मोठ्या नियुक्त्या करण्यात आल्या आहेत. यात युवासेना नेते, वरूण सरदेसाई, डबल महाराष्ट्र केसरी चंद्रहार पाटील आणि शिवसेना नेते, वसंत मोरे यांच्यावर मोठी जबाबदारी देण्यात आली आहे. त्यामुळे तीनही नेते विधानसभेच्या रिंगणात उतरणार का? हे पाहणं महत्त्वाचं ठरणार आहे.

शिवसेना ( ठाकरे गट ) पक्षप्रमुख उद्धव ठाकरे यांच्या आदेशानं शिवसेना ( Shivsena ) सचिवपदी संजय लाखे-पाटील यांची नियुक्ती करण्यात आली आहे. तर, डबल महाराष्ट्र केसरी चंद्रहार पाटील यांच्यासह शिवसेनेचे चार संघटक जाहीर करण्यात आले आहेत. ललिता पाटील, वसंत मोरे, मुकेश साळुंके यांची शिवसेना संघटकपदी नियुक्ती करण्यात आली आहे.

वरूण सरदेसाई वांद्रे पूर्व विधानसभाप्रमुख

युवासेने नेते, वरूण सरदेसाई यांची मुंबई उपनगर जिल्ह्यातील वांद्रे पूर्व विधानसभा प्रमुखपदी नियुक्ती करण्यात आली आहे. वरूण सरदेसाई वांद्रे पूर्व मतदारसंघातून लढण्यासाठी इच्छुक आहेत. अनेक दिवसांपासून ते तेथून तयारी करताना दिसत आहेत. येथे काँग्रेसचे झिशान सिद्दीकी विद्यमान आमदार आहेत. मात्र, सिद्दीकी यांची राष्ट्रवादी काँग्रेसशी ( अजितदादा पवार ) जवळीकता वाढली आहे. त्यामुळे हा मतदारसंघ काँग्रेस लढणार की शिवसेना हे आगामी काळात कळेल.

खडकवासला की हडपसर?

दुसरीकडे मनसेतून वंचित व्हाया शिवसेना, असा प्रवास करून आलेले वसंत मोरे यांचा लोकसभा निवडणुकीत पराभव झाला होता. वसंत मोरे यांनी वंचितकडून लोकसभा निवडणूक लढवली होती. मात्र, पराभवानंतर मोरे यांनी 'मशाल' हाती घेतली. वसंत मोरे हडपसर किंवा खडकवासला मतदारसंघातून विधानसभा लढविण्यास इच्छुक आहेत.

चंद्रहार पाटील विधानसभा लढविणार?

तर, लोकसभेतील पराभवानंतर चंद्रहार पाटील सांगली जिल्ह्यात सक्रिय झाले आहेत. शिवसेना हा पक्ष सांगली जिल्ह्यातील खानापूर आणि मिरज या जागा लढविणार असल्याचं चंद्रहार पाटील यांनी सांगितलं आहे. मात्र, चंद्रहार पाटील स्वत:हा विधानसभेच्या रिंगणात उतरणार का? हे पाहावं लागणार आहे.