Shrikant Shinde Reply Wadettiwar: वडेट्टीवारसाहेब, मुख्यमंत्र्यांची काळजी तुम्ही करू नका; तुम्ही तुमचा पक्ष सांभाळा : श्रीकांत शिंदेंचा टोला

Dombivli Political News: मुख्यमंत्र्यांची काळजी तुम्ही करू नका, मुख्यमंत्री एकनाथ शिंदे सक्षम आहेत. विजय वडेट्टीवारसाहेब, तुम्ही तुमची लोकं सांभाळण्याकडे लक्ष द्या. स्वतःचा पक्ष मजबूत आणि मोठा करण्यासाठी काम करा, असे टोला खासदार डॉ. श्रीकांत शिंदे यांनी विरोधी पक्षनेते विजय वडेट्टीवार यांना लगावला.

आरोग्याचे कारण देऊन मुख्यमंत्री एकनाथ शिंदे यांचा राजीनामा घेऊन अजितदादांना मुख्यमंत्री करायचा प्रयत्न सुरू तर नाही ना, अशी शंका आहे, असे विधान विरोधी पक्षनेते विजय वडेट्टीवार यांनी केले होते. त्याला मुख्यमंत्र्यांचे चिरंजीव खासदार श्रीकांत शिंदे यांनी प्रत्युत्तर दिले आहे.

खासदार शिंदे म्हणाले की, महाविकास आघाडीत कोणी शिल्लक राहते की नाही, अशी परिस्थिती आहे. मुख्यमंत्री आज बदलतील, उद्या बदलतील, अशी त्यांना गेल्या दीड वर्षापासून स्वप्नं पडत आहेत. पण, काहीच बदल होत नाही. मुख्यमंत्री जोमाने काम करत असून महाराष्ट्राला पुढे नेत आहेत. मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांचे डबल इंजिन सरकार ज्या पद्धतीने काम करत आहे, ते पाहून अजित पवार हेही या सरकारमध्ये सामील झाले आहेत.

महाविकास आघाडीत आपल्यासोबत कोण राहतं की नाही, असा प्रश्न विरोधकांना पडलेला आहे. ज्या पक्षाचे विजय वडेट्टीवार नेतृत्व करतात, त्या पक्षाची आज काय अवस्था आहे. त्यांनी आपली लोक सांभाळण्याकडे लक्ष द्यावं. मुख्यमंत्री बदलतील, या मानसिकेतून त्यांनी बाहेर पडावं आणि आपला पक्ष कसा मजबूत होईल आणि वाढेल, यासाठी प्रयत्न करावेत, असा सल्लाही श्रीकांत शिंदे यांनी वडेट्टीवार यांना दिला.

ते म्हणाले की, मुख्यमंत्री एकनाथ शिंदे सक्षम आहेत. त्यांची काळजी तुम्ही करू नका. ते राज्यातील गोरगरिब लोकांना न्याय देण्याचे काम करीत आहेत. आपण आपल्या पक्षाचा विचार गंभीरतेने करावा. याचवेळी शिंदे यांनी महाराष्ट्र सरकार आणि केंद्र सरकारच्या योजनांबद्दल माहिती दिली.

स्वातंत्र्यदिनानिमित्त डोंबिवलीत १५० फूट उंचीच्या राष्ट्रध्वजाला वंदन करण्यात आले. खासदार डॉ. श्रीकांत शिंदे यांच्या हस्ते ध्वजवंदन करण्यात आले. या वेळी डोंबिवलीकरांनी भारत माता की जय अशा घोषणाही दिल्या.