Nagpur BJP : CM फडणवीसांनी विश्वासू नेत्याकडे दिली 'नागपूरची' जबाबदारी : लोकसभेला हिरमोड झालेला नेताही सोबतीला!

Nagpur BJP : नागपूर जिल्ह्यात होणाऱ्या जिल्हा परिषद, पंचायत समिती, नगरपालिका, महापालिकेच्या निवडणुकीची जबाबदारी भाजपने प्रवीण दटके यांच्यावर सोपविली आहे. जिल्ह्यात अनेक अनुभवी नेते असताना प्रथमच मध्य नागपूरमधून निवडून आलेले दटके यांना एकप्रकारे भाजपने पदोन्नतीची दिली आहे. ते नागपूर शहराचे महापौरसुद्धा होते. त्यांच्या मदतीसाठी ग्रामीण भागातून निवडणूक प्रमुख म्हणून भाजपचे माजी जिल्हाध्यक्ष डॉ. राजीव पोतदार आणि माजी जिल्हाध्यक्ष अरविंद गजभिये यांना सोबत देण्यात आले आहे.

प्रवीण दटके हे मुख्यमंत्री देवेंद्र फडणवीस यांचे अत्यंत विश्वासू समजले जातात. चार वर्ष ते विधान परिषदेवर होते. विधानसभेच्या निवडणूक त्यांनी मध्य नागपूरमधून लढवली. मुस्लिम आणि हलबा बहुल असलेल्या या मतदारसंघातून दटके हे निवडून आले आहेत. याच मतदारसंघातील विजयाची हॅटट्रिक साधलेल्या आमदार विकास कुंभारे यांना भाजपने यावेळी थांबवले होते. त्यामुळे हलबा समाज मोठ्या प्रमाणात नाराज होता. जातीय समिकरण बघता दटके यांच्याविषयी सर्वांनाच धाकधकू वाटत होती.

नगरपालिका आणि नगर पंचायतची निवडणूक सध्या जाहीर झाली आहे. त्यानंतर जिल्हा परिषद आणि महापालिकेची निवडणूक होणार आहे. येणाऱ्या 3 महिन्यात स्थानिकच्या सर्वच निवडणुका होणार आहेत. याकरिता भाजपने प्रवीण दटके यांची संपूर्ण जिल्ह्याचे निवडणूक प्रभारी म्हणून नियुक्ती केली आहे.

ग्रामीणमध्ये प्रवीण दटके यांना दोन जुन्या व ज्येष्ठ नेत्यांची साथ लाभणार आहे. भाजपचे माजी जिल्हा प्रमुख डॉ. राजीव पोतदार आणि दुसरे माजी जिल्हा प्रमुख अरविंद गजभिय यांची निवडणूक प्रमुख म्हणून नियुक्ती करण्यात आली आहे. अरविंद गजभिये रामटेक लोकसभा मतदारसंघासाठी इच्छुक होते. मात्र ही जागा शिंदे सेनेने सोडण्यास नकार दिला होता. शेवटी काँग्रेसचे माजी आमदार राजू पारवे यांना आयात करून महायुतीचे उमेदवार करण्यात आले होते. मात्र भाजपचा हा प्रयोग फसला.

ही लोकसभा सलग दोनवेळा शिवसेनेच्या कृपाल तुमाने यांनी जिंकून दिली होती. या लोकसभेच्या निवडणुकीत आयात धोरणामुळे भाजपला मोठा फटका बसला होता. भाजप आमदारांच्या सर्वच विधानसभा मतदारसंघातून मोठ्या प्रमाणात मताधिक्य घटले होते. यात भाजपचे तत्कालीन प्रदेशाध्यक्ष आणि विद्यमान महसूल व नागपूर जिल्ह्याचे पालकमंत्री चंद्रशेखर बावनकुळे यांच्याही कामठी मतदारसंगाचा समावेश होता. ही कसर भाजपच्या सर्व आमदारांनी विधानसभेत भरून काढली.

नागपूर ग्रामीणमध्ये भाजपला अद्यापही हमखास निवडून येण्याची गॅरंटी नाही. ग्रामीणधील लोकांचा कल काँग्रेसकडे आहे. त्यातही शेतकऱ्यांची मोठी नाराजी सरकारवर आहे. आमदारांना भविष्याती आपले स्थान टिकवून ठेवण्यासाठी स्थानिक निवडणुकीत मोठी मशागत करावी लागणार आहे.