-राजेश चरपे
Nagpur NCP News : कन्हान येथे झालेल्या पंतप्रधान नरेंद्र मोदी यांच्या सभेसाठी राष्ट्रवादी काँग्रेसच्या पदाधिकाऱ्यांना निमंत्रण नसल्याने सभा सुरू असताना राष्ट्रवादी काँग्रेसचे प्रमुख पदाधिकारी पक्ष कार्यालयात बसून होते. तसेच एकाही पदाधिकाऱ्याला व्यासपीठावर प्रवेश दिला नाही. पक्षाचे राष्ट्रीय उपाध्यक्ष प्रफुल पटेल यांना भाषणाची संधी दिली नसल्याने राष्ट्रवादीच्या कार्यकर्त्यांमध्ये नाराजीचा सूर पसरला आहे. .
महायुतीचे रामटेकमधून राजू पारवे उमेदवार आहेत. असे असतानाही प्रचारासाठी तसेच सभा, बैठकांसाठी अजित पवार यांच्या राष्ट्रवादी काँग्रेसच्या पदाधिकारी व कार्यकर्त्यांना विश्वासात घेतले जात नसल्याने असंतोष निर्माण झालेला आहे. या असंतोषात मोदी यांच्या सभेनंतर भरच पडली आहे. मोदी यांच्या सभेसाठी राष्ट्रवादी काँग्रेसच्या पदाधिकाऱ्यांना निमंत्रण नसल्याने सभा सुरू असताना राष्ट्रवादी काँग्रेसचे प्रमुख पदाधिकारी पक्ष कार्यालयात बसून होते. तसेच एकाही पदाधिकाऱ्याला व्यासपीठावर प्रवेश दिला नाही.
तर दुसरीकडे सभेत केंद्रीय मंत्री रामदास आठवले, बहुजन रिपब्लिकन एकता मंचच्या नेत्या ॲड. सुलेखा कुंभारे या मित्रपक्षांच्या नेत्यांची भाषणे झाली. मात्र, खासदार प्रफुल पटेल व्यासपीठावर उपस्थित असतानाही त्यांना भाषणाची संधी देण्यात आली नाही. महायुतीची सभा असल्याने भाजप आणि शिवसेनेच्या जिल्हाध्यक्षांना व्यासपीठावर स्थान देण्यात आले होते.
भाजपचे जिल्हाध्यक्ष सुधाकर कोहळे, शहराध्यक्ष बंटी कुकडे, शिवसेनेचे जिल्हाध्यक्ष संदीप इटकेलवार या वेळी उपस्थित होते. राष्ट्रवादीचे जिल्हाध्यक्ष बाबा गुजर आणि शहराध्यक्ष प्रशांत पवार यांना सभेचे निमंत्रण नव्हते. ही बाब काही पदाधिकाऱ्यांनी कार्याध्यक्ष प्रफुल पटेल यांच्या निदर्शनास आणून दिली. परंतु, निवडणुकीचा माहोल असल्याने त्यांनी या विषयावर बोलण्याचे टाळल्याचे समजते.
मोदी यांची सभा सुरू असताना राष्ट्रवादी काँग्रेसचे प्रमुख पदाधिकारी कन्हानमध्येच होते. येथील पक्ष कार्यालयात ते पूर्णवेळ बसून होते. मात्र, निमंत्रण नसल्याने ते सभेला गेले नाहीत, असे समजते. शिवसेनेच्या कार्यकर्त्यांचे जिल्ह्यात जाळे नाही. राजू पारवे यांच्यासोबत त्यांच्या गावातले कार्यकर्तेही शिवसेनेत गेले नाहीत. त्यातुलनेत राष्ट्रवादीकडे अनेक चांगले व सक्षम कार्यकर्ते आहेत. जिल्हा परिषद व ग्राम पंचायत सदस्य आहेत.
(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)
असे असतानाही राष्ट्रवादीकडे विचारणा केली जात नाही, असा या पक्षाच्या पदाधिकाऱ्यांचा आक्षेप आहे. भाजपला पारवे यांच्या माध्यमातून आपला प्रचार करायचा आहे. नाइलाज म्हणून धनुष्यबाणाला समोर करावे लागत आहे. आगामी विधानसभेच्या निवडणुका डोळ्यांसमोर ठेवून भाजपचे नेते जिल्ह्यातील सर्व सहा मतदारसंघात लढण्याची तयारी करीत आहेत. विधानसभेत राष्ट्रवादीने मतदारसंघ मागू नये, याकरिता हा खटाटोप सुरू असल्याचे पक्षाच्या एका नेत्याने सांगितले.
Edited By : Umesh Bambare
R
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.