Baramati Loksabha constituancy : शरद पवारांचा बारामतीत धमाका; फडणवीसांना ‘इट का जवाब पत्थर से’

Baramati Loksabha News : पुणे जिल्हा भारतीय जनता पक्षाचे दोनवेळेस जिल्हाध्यक्ष राहिलेले नामदेव ताकवणे यांनी राष्ट्रवादी काँग्रेस शरदचंद्र पवार पक्षात जाहीर प्रवेश केला आहे. या प्रवेशामुळे दौंडमध्ये खासदार सुप्रिया सुळे यांना मोठे बळ मिळणार आहे. शरद पवार यांनी या माध्यमातून देवेंद्र फडणवीस यांना ‘इट का जवाब पत्थर से’ दिला आहे.

बारामतीत खासदार सुप्रिया सुळे विरुद्ध सुनेत्रा पवार अशी प्रतिष्टेची लढत होत आहे. यामाध्यमातून खासदार शरद पवार विरुद्ध उपमुख्यमंत्री अजित पवार अशीच लढत मानली जात आहे. दोघांचीही प्रतिष्ठा पणाला लागली आहे. त्यामुळे खासदार शरद पवार बारामतीत ठाम मांडून होते.

मध्यंतरी इंदापूरच्या दौऱ्यावर आलेले देवेंद्र फडणवीस यांनी हर्षवर्धन पाटील यांची भेट घेण्यापूर्वी शरद पवारांचे निकटवर्तीय सोनाई डेअरीचे चेअरमन प्रवीण माने यांची भेट घेतली होती. त्यानंतरच प्रवीण माने यांनी अजित पवारांच्या राष्ट्रवादीत जाण्याचा निर्णय घेतला. प्रवीण माने हे इंदापूरात सुप्रिया सुळे यांचा प्रचार करत होते. मात्र, त्यांनी अजित पवार यांच्यासोबत जाण्याचा निर्णय घेतला आहे. आहे.

यामुळे शरद पवार Sharad Pawar यांनी बारामती दौऱ्यात पुणे जिल्हा भारतीय जनता पक्षाचे माजी जिल्हाध्यक्ष नामदेव ताकवणे यांचा राष्ट्रवादी काँग्रेस शरदचंद्र पवार पक्षात प्रवेश केला. त्यांनी श्री. पवार यांची भेट घेतली आहे. नामदेव ताकवणे हे जनसंघाचे दौंडचे माजी आमदार राजाराम ताकवणे यांचे सुपुत्र आहेत.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

ताकवणे यांच्या तीन पिढ्या या भाजप व आरएसएससोबत राहिलेल्या आहेत. भीमा पाटस सहकार साखर कारखान्याचा ५०० कोटींचा भ्रष्टाचार त्यांनी बाहेर काढला होता. दौंडमध्ये ताकवणे यांच्या मुळे सुप्रिया सुळे यांना मोठे बळ मिळणार आहे. यामाध्यमातून खासदार शरद पवार यांनी देवेंद्र फडणवीस यांना 'इट का जवाब पत्थर से' दिला आहे.

Edited By : Umesh Bambare