Baramati Politics : बारामतीत 'पवार पाॅवर'; अजितदादांनी तळ ठोकला तर शरद पवारही मैदानात...

Baramati News : लोकसभा निवडणुकीच्या अनुषंगाने बारामती मतदारसंघात राजकीय घडामोडींना वेग आला आहे. प्रचारासाठी ज्येष्ठ नेते शरद पवार आणि उपमुख्यमंत्री अजित पवार यांनी मतदारसंघात लोकांच्या भेटीगाठींवर आणि संपर्क साधण्यावर भर दिला आहे. यावेळची निवडणूक बारामतीत थेट पवार विरुद्ध पवार अशीच होणार आहे. त्यामुळे बारामतीकर नेमकं कुणाच्या पाठीमागे ? ते या निवडणुकीत स्पष्ट होणार आहे.

अजित पवार यांनी मागील दोन दिवसांपासून बारामतीतच तळ ठोकला आहे. या वेळी त्यांनी विविध लोकांशी संवाद साधला. चर्चा, सभा, मेळावे, भेटींसह डिनर डिप्लोमसीही साधली. तर दुसरीकडे शरद पवार यांनीही विविध मान्यवरांच्या गाठीभेटी घेतल्या. मतदारसंघातील विविध घटकांच्या संपर्कावरही त्यांनी भर दिला आहे.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

उमेदवारी अर्ज दाखल केल्यानंतर उमेदवारांना प्रचारासाठी 17 दिवस मिळणार आहेत. एवढ्या कालावधीत मतदारसंघातील सर्वच विधानसभा मतदारसंघातल्या मतदारांपर्यंत पोहोचून प्रचार करण्याचे आव्हान सुप्रिया सुळे आणि सुनेत्रा पवार (Sunetra Pawar) यांच्यासमोर असणार आहे. दोन्ही गटांतील किती स्टार प्रचारक या मतदारसंघात येणार याकडेही सर्वांचे लक्ष लागले आहे. दरम्यान, येथील महायुतीच्या उमेदवार सुनेत्रा पवार व महाविकास आघाडीच्या उमेदवार सुप्रिया सुळे या गुरुवारी (ता. 18) पुण्यात आपापला उमेदवारी अर्ज दाखल करणार आहेत. या निमित्ताने पुण्यात दोन्ही बाजूने मोठे शक्तिप्रदर्शन होईल अशी अपेक्षा आहे.

दरम्यान, सुप्रिया सुळे (Supriya Sule) यांचा बारामती विधानसभा मतदारसंघाचा प्रचाराचा सुरुवात शुक्रवारी (ता.18) तालुक्यातील श्री क्षेत्र कण्हेरी येथून होणार आहे. पवार कुटुंबीयांच्या प्रत्येक निवडणुकीचा बारामतीतील नारळ श्री क्षेत्र कण्हेरी येथूनच करण्याची परंपरा आहे, सुप्रिया सुळे यांनी यंदाही ही परंपरा जपण्याचा प्रयत्न केला आहे.

R