Jankar Increase tension to Kolhe-Adhalrao : महादेव जानकर वाढविणार डॉ. कोल्हे-आढळरावांचे टेन्शन...

Manchar News : राष्ट्रीय समाज पक्षाचे अध्यक्ष महादेव जानकर हे राष्ट्रवादी काँग्रेसचे खासदार डॉ. अमोल कोल्हे आणि माजी खासदार शिवाजीराव आढळराव पाटील यांचे टेन्शन वाढविणार असे दिसते आहे. कारण, राष्ट्रीय समाज पक्ष हा बारामती आणि शिरूर लोकसभा मतदारसंघात स्वबळावर निवडणूक लढविणार असल्याची घोषणा जानकर यांनी आज केली आहे. त्यामुळे मतविभागणीचा फटका कोणला बसतो, हे पाहणे महत्वाचे ठरणार आहे. (Mahadev Jankar will increase the tension between Kolhe and Adhalrao patil)

माजी मंत्री महादेव जानकर यांच्या नेतृत्वाखाली राष्ट्रीय समाज पक्षाने काढलेल्या रथयात्रेचे शनिवारी (ता. १६ सप्टेंबर) आंबेगाव तालुक्यातील मंचर येथे सर्व जाती धर्माच्या कार्यकर्त्यांनी जोरदार स्वागत केले. त्यावेळी माध्यमांशी बोलताना त्यांनी शिरूर आणि बारामती लोकसभा मतदारसंघाबाबतचा रासपचा निर्णय जाहीर केला.

महाराष्ट्रातील ४८ लोकसभा मतदार संघात राष्ट्रीय समाज पक्ष स्वबळावर निवडणूक लढवणार आहे. त्यात बारामती आणि शिरूर लोकसभा मतदार संघाचा समावेश आहे. मराठा, मुस्लीम व धनगर या समाजाच्या आरक्षणाचा प्रश्न सत्तेत आल्यानंतर दोनच दिवसांत मार्गी लावण्यात येईल, अशी ग्वाही त्यांनी दिली. जानकर यांनी या वेळी काँग्रेस आणि भाजपवर सडकून टीका केली.

जानकर म्हणाले की, काँग्रेस आणि भाजप कधीही आरक्षण देणार नाहीत. कारण, या पक्षांनी जनतेला गेली अनेक वर्षे झुलवत ठेवण्याचे काम केले आहे. मागील निवडणुकीत आम्ही भाजपबरोबर होतो. पण त्यांना आता छोट्या पक्षाची गरज वाटत नाही, त्यामुळे आम्ही विविध राज्यात रथयात्रेच्या माध्यमातून राष्ट्रीय समाज बळकट करण्याचा प्रयत्न करत आहोत. गावोगावी आम्हाला लोकांचा प्रतिसादही चांगला मिळत आहे.

इंडिया आघाडी अथवा भाजपकडून आम्हाला निमंत्रण आल्यास युतीबाबत विचार करण्यात येईल अन्यथा आम्ही स्वबळाचा मार्ग निवडला आहे. सर्व जाती धर्माच्या लोकांना बरोबर घेऊन रासपची पक्षसंघटना मजबूत करण्याचे काम करण्यात येत आहे. आम्हाला विचारल्याशिवाय राज्यात व देशात सत्ता स्थापन होऊ शकणार नाही, असे संख्याबळ आम्हाला तयार करायचे आहे, असेही त्यांनी नमूद केले.

या वेळी राष्ट्रीय समाज पक्षाचे राष्ट्रीय महासचिव सुशील कुमार, ज्ञानेश्वर सलगर, युवक अध्यक्ष अजित पाटील, समन्वयक सचिन गुरव, अॅड संजय माने, विनायक रुपनवर, सचिन लोंढे, भाऊसाहेब घोडे, योगेश धरम उपस्थित होते.