Indapur Obc Melava : मोहिते पाटील, हर्षवर्धन पाटील, काकडे, जाचक कुणबीचे प्रमाणपत्र घेणार का? भुजबळांचा सवाल

Indapur News : राज्यातील सर्व मराठ्यांना सरसकट कुणबी प्रमाणपत्र द्या, अशी मागणी मनोज जरांगे पाटील करतात. मग इंदापूरचे हर्षवर्धन पाटील, अकलूजचे विजयसिंह मोहिते, काकडे, जाचक हे कुणबीचे प्रमाणपत्र घेणार का? नको असेल तर नाही म्हणून सांगा. पण, हे नेते गप्प का बसले आहेत, असा सवाल मंत्री छगन भुजबळ यांनी केला. (Mohite Patil, Harshvardhan Patil, Kakade, Jachak Will take Kunbi certificate? : Bhujbal)

इंदापूरमध्ये ओबीसी मेळावा सुरू आहे. त्यात बोलताना छगन भुजबळ यांना मोहिते पाटील, हर्षवर्धन पाटील या बड्या नेत्यांना कुणबी प्रमाणपत्र घेणार का, असा सवाल केला. तसेच, जरांगे म्हणतात की, राज्यातील सर्व मराठ्यांना कुणबी प्रमाणपत्र द्या, म्हणजे राज्यात एकही मराठा उरणार नाही, असेही त्यांनी म्हटले आहे.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

छगन भुजबळ म्हणाले की, बीडमध्ये आमदारांची घरे पेटवली. आपल्याच स्वकीयांवर हल्ले करा. बायका-मुलांवर हल्ले करा, असे छत्रपती शिवाजी महाराजांनी शिकवलं आहे का? मोठंमोठे नेतेही त्यावर बोलायला तयार नाहीत. कसली भीती वाटते. निवडणुकीतील मतांची. मतं त्यांच्याकडे आहेत आणि आमच्याकडे नाहीत का? त्यांच्याकडे २० टक्के आहेत, तर आमच्याकडेही ८० टक्के मते आहेत.

मी बोललो की महाराष्ट्रात अशांतता निर्माण केली जात आहे, असे काही विचारवंत म्हणतात. पण, राज्यात शांतता असेल तर उद्योगधंदे येतील. तरुणांच्या हाताला काम मिळेल. राज्याची आर्थिक सुबत्ता वाढेल, हे सर्व मान्य आहे. पण अशांतता कोण निर्माण करतं, याचा विचारही सर्व विचारवंतांनी करण्याची गरज आहे. आम्हालाही सर्व काही ऐकून घेण्याची सवय नाही. त्यामुळे ‘आमचेही सौ सोनार की एक लोहार की’ असे असते, असा इशाराही भुजबळ यांनी दिला.

भुजबळ म्हणाले की, लाठीहल्ला आणि पोलिसांवर झालेला हल्ला याचा उल्लेख पुन्हा एकदा मंत्री छगन भुजबळ यांनी केला. महिला पोलिसांवर हात टाकण्यात आला होता, त्यानंतर पोलिसांनी लाठीहल्ला केला. त्यावर देवेंद्र फडणवीस यांनी अधिवेशनात लेखी उत्तर दिलं. जमाव हिंसक झाला. त्यात ७९ पोलिस अधिकारी-कर्मचारी जखमी झाले. त्यावेळी पोलिसांनी केलेल्या लाठीहल्ल्यात ५० आंदोलक जखमी झाले. हे खरं शेवटी विधानसभेतून बाहेर आले.