Shiv Sena Reshuffle Pune: आगामी निवडणुकांसाठी शिवसेनेत खांदेपालट! पुणे जिल्ह्यात दोन मोठे फेरबदल

Pune District Shiv Sena Updates: आगामी स्थानिक स्वराज्य संस्थांच्या निवडणुकीच्या पार्श्वभूमीवर सर्वच पक्षामध्ये संघटनात्मक पातळीवर फेरबदल करण्यात येत आहेत. असेच फेरबदल पिंपरी-चिंचवड शहर शिवसेनेत करण्यात आले आहे. स्थानिक स्वराज्य संस्थांच्या निवडणुकीत शिवसेना पुणे जिल्ह्यातील सर्व निवडणुका पूर्ण ताकदीने लढणार आहे.

स्थानिक स्वराज्य संस्था निवडणूक 2025 ही शिवसेनेच्या प्रतिष्ठेची लढाई ठरणार आहे. भाजप, राष्ट्रवादी काँग्रेस आणि काँग्रेस या तिन्ही पक्षांशी थेट सामना करण्यासाठी संघटनात्मक बळकटपणा आवश्यक असल्याने पक्षांतर्गत फेरबदल करण्यात आले आहेत.

पिंपरी-चिंचवड शहर शिवसेनेत आगामी स्थानिक स्वराज्य संस्थांच्या निवडणुका डोळ्यासमोर ठेवून संघटनात्मक फेरबदल करण्यात आले आहेत. पिंपरी-चिंचवड महानगर प्रमुखपदी राजेश वाबळे आणि पिंपरी, चिंचवड व मावळ विधानसभा समन्वयकपदी बाळासाहेब वाल्हेकर यांची नियुक्ती करण्यात आली आहे.

राजेश खांडभोर जिल्हाप्रमुख, तर शीला भोंडवे जिल्हा संघटिका

आगामी निवडणुका शिवसेना पूर्ण ताकदीने लढणार असल्याने त्यादृष्टीने संघटना बांधणी, नियोजन सुरू आहे. त्यासाठी हे बदल करण्यात आले. जिल्हाप्रमुख बाळासाहेब वाल्हेकर यांच्याकडे पिंपरी, चिंचवड आणि मावळ विधानसभा मतदारसंघाच्या समन्वयकपदाची जबाबदारी देण्यात आली आहे. मावळ तालुकाप्रमुख राजेश खांडभोर यांची आता जिल्हाप्रमुखपदी नियुक्ती झाली आहे.

उपजिल्हाप्रमुख राजेश वाबळे यांची पिंपरी-चिंचवड महानगर प्रमुखपदी नियुक्ती केली आहे. पिंपरी, चिंचवड आणि मावळ विधानसभा मतदारसंघाच्या जिल्हा संघटिकापदी शीला भोंडवे यांची नियुक्ती केली आहे. तर, मावळ तालुकाप्रमुखपदी राम सावंत यांची नियुक्ती करण्यात आली आहे, अशी माहिती शिवसेनेचे सचिव संजय मोरे यांनी दिली.राजेश खांडभोर आणि शीला भोंडवे यांच्यासमोर आता पक्षाचा जनाधार वाढवणे, मतदारांपर्यंत पोहोच वाढवणे आणि निवडणुकीत पक्षाला विजय मिळवून देणे ही मोठी जबाबदारी आहे.

शिवसेना उपनेते तसेच खासदार श्रीरंग बारणे म्हणाले, "आगामी स्थानिक स्वराज्य संस्थांच्या निवडणुकीच्या पार्श्वभूमीवर पिंपरी-चिंचवड शहर शिवसेनेत संघटनात्मक बदल केले आहेत. शिवसेना पुणे जिल्ह्यातील सर्व निवडणुका पूर्ण ताकदीने लढणार आहे. नवीन पदाधिकाऱ्यांच्या मार्गदर्शनाखाली मावळ लोकसभा मतदारसंघात संघटना आणखी मजबूत होईल. जिल्हा परिषद, पंचायत समिती, नगरपरिषद, महापालिकेत शिवसेनेचे जास्तीत जास्त नगरसेवक निवडून आणण्यासाठी नवनियुक्त पदाधिकाऱ्यांनी झपाटून कामाला लागावे. केंद्र, राज्य सरकारचे निर्णय लोकांपर्यंत पोहोचववेत. राज्य सरकारच्या योजनांचा लाभ नागरिकांना मिळवून द्यावा,"

राजेश खांडभोर

राजेश खांडभोर हे कार्यकर्त्यांमध्ये लोकप्रिय असून संघटनात्मक कौशल्यासाठी ओळखले जातात. त्यांच्या नियुक्तीमुळे शिवसेनेला ग्रामीण भागात आणि शहरी भागात बळकटी मिळण्याची शक्यता आहे.

शीला भोंडवे

शीला भोंडवे यांना जिल्हा संघटिकेची धुरा सोपवण्यात आली आहे. महिला कार्यकर्त्यांना सक्रिय करून निवडणुकीत प्रभावी भूमिका बजावण्याचे उद्दिष्ट या नियुक्तीद्वारे साधले जाणार आहे.