Pune News : ‘भाजपने सांगितलेलेच फक्त ऐकण्याचे काम शिवसेनेचे नेते करत आहेत. तुम्ही भाजपकडे फक्त 15 जागाच कशा मागितल्या? तुम्ही शिवसेनेला ताकद देताय की खच्चीकरण करत आहात? भाजपच्या सांगण्यावरून शिवसेना चालणार आहे का?’ असे सवाल उपस्थित करत शिवसेनेच्या इच्छुक शिवसैनिकांनी शुक्रवारी शिवसेनेच्या नेत्या नीलम गोऱ्हे यांच्या घराबाहेर आंदोलन केले.
पुणे महानगरपालिका निवडणुकीमध्ये भाजप आणि शिवसेना एकत्रित युतीमध्ये लढणार असून दोन्ही पक्षांमध्ये मात्र जागा वाटपावरून धुसफुस सुरू आहे. तर शिवसेनेने २५ जागांची मागणी केली असताना भाजपने शिवसेनेला 15 जागा देऊ केल्या आहेत. त्यावरून नाराज झालेल्या शिवसेनेतील इच्छुक उमेदवार, कार्यकर्ते यांनी शुक्रवारी गोऱ्हे यांच्या मॉडेल कॉलनीतील घरासमोर घोषणाबाजी करत आंदोलन केले. त्यांनी यावेळी गोऱ्हे यांच्यावर गंभीर आरोप देखील केले. त्यामुळे गोऱ्हे यांच्या घराबाहेर पोलिसांचा बंदोबस्त देखील तैनात करण्यात आला आहे.
‘जे कार्यकर्ते 5 वर्ष काम करत आहेत त्यांना डावलले जात आहे. आम्ही दिलेला कामाचा अहवाल बघितला जात नाही. ज्या भागामध्ये नीलम गोऱ्हे राहतात, त्या भागामध्ये आजपर्यंत शिवसेनेचा नगरसेवक झालेला नाही. त्यांनी कधीही शिवसेना या भागात वाढू दिली नाही. गोऱ्हे आणि शिवसेनेच्या पुण्यातील नेत्यांनी निवडणुकीची तिकिटे कमर्शिअल पद्धतीने द्यायचं ठरवले आहे का?’ असा आरोपही यावेळी जमलेल्या इच्छुक आणि कार्यकर्त्यांनी केला. तर एकनाथ शिंदे यांचे भाजपकडून खच्चीकरण सुरू आहे, आमची खूप आधीपासूनची ही खदखद आहे. ती खदखद व्यक्त करायला आज इथे आलो आहे, अशाही भावना इच्छुक उमेदवारांनी व्यक्त केल्या.
‘‘शिवसेना (Shivsena) कार्यकर्त्यांना शिवसैनिकांना चुकीची माहिती मिळाली असून भाजपकडे 25 पेक्षा अधिक जागांची मागणी केली आहे. तसेच उमेदवारीचे तिकीट वाटपाचा निर्णय कुणी एक व्यक्ती घेत नसून शहरातील कोअर कमिटीतील नेते तिकीट वाटपाचा निर्णय घेतात’’ असे सांगत नीलम गोऱ्हे यांनी कमर्शिअल तिकीट वाटपाचा मुद्दा खोडून काढला. मात्र, अपेक्षित जागा मिळाल्या नाहीत तर पक्षाच्या वरिष्ठांचा आदेश स्वतंत्रपणे लढा असा आला तर तो देखील निर्णय घेऊ. आंदोलकांचे म्हणणे ऐकून घेऊन त्यांची समजूत काढली, असेही त्यांनी सांगितले.
भाजपने (BJP) सांगितलेलेच फक्त ऐकण्याचे काम शिवसेनेचे नेते करत आहेत.
जागावाटपाचा निर्णय त्यांना विश्वासात न घेता घेण्यात आला आहे.
8 उमेदवार बाहेरून आलेले व 6 उमेदवार प्रमोद भानगिरे यांच्या कुटुंबातील असल्याने निष्ठावंत पदाधिकाऱ्यांवर अन्याय
जे कार्यकर्ते पाच वर्ष काम करत आहेत त्यांना डावलले जात आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.