Rahul Gandhi News: राहुल गांधींविरोधातील ‘मुख्य पुरावा’ निघाला कोरा; सावरकर मानहानी प्रकरणात मोठा ट्विस्ट...

Pune News : पुणे कोर्टामध्ये काँग्रेस नेते राहुल गांधी यांच्या विरोधात स्वातंत्र्यवीर विनायक दामोदर सावरकर यांच्या कथित मानहानी प्रकरणाची सुनावणी सुरू आहे. देशाचे लक्ष लागलेल्या या प्रकरणाच्या सुनावणी दरम्यान एक अत्यंत नाट्यमय घटना घडल्याची पाहायला मिळाली.

राहुल गांधी (Rahul Gandhi) यांनी लंडनमध्ये 2019 मध्ये एक भाषण केलं होतं. त्या भाषणादरम्यान सावरकर यांच्याबाबत त्यांनी आक्षेपार्ह टिप्पणी केल्याचा आरोप सावरकर यांचे पणतू सत्यकी सावरकर यांनी केले आहेत. त्यासंदर्भात 2019 पासून पुणे कोर्टामध्ये याबाबत खटला सुरू आहे.

या खटल्याच्या सुनावणी दरम्यान न्यायदंडाधिकारी अमोल शिंदे यांच्यासमोर नुकतीच सत्यकी सावरकर यांची उलटतपासणी घेण्यात आली. यावेळी मुख्य पुरावा म्हणून जे भाषण लंडनमध्ये राहुल गांधी यांनी केले होते. त्याबाबतची सीडी कोर्टामध्ये चालवण्यास सुरुवात केली.

मात्र, त्यानंतर एक धक्कादायक प्रकार घडला या सीडीमध्ये कोणताही डेटा नसल्याचं समोर आलं ही सीडी पूर्णत: रिकामी असल्याचं निदर्शनास आल्याने सर्वांनाच धक्का बसला. सीडी कोरी निघाल्याचे पाहून तक्रारदार सत्यकी सावरकर यांचे वकील संग्राम कोल्हटकर यांनाही आश्चर्याचा धक्का बसला.

त्यांनी सीडी ब्लँक आढळल्यामुळे कोर्टाला (Court) लगेचच यू-ट्यूबवर उपलब्ध असलेले राहुल भाषणाचा तो व्हिडिओ लावण्याची परवानगी मागितली . मात्र, राहुल गांधी यांचे वकील मिलिंद दत्तात्रय पवार यांनी त्यावर आक्षेप घेतला. न्यायालयाने पवार यांचा विरोध स्वीकारत यू-ट्यूबवरील व्हिडीओ चालवण्याची मागणी फेटाळून लावली.

या कथित भाषणाची रेकॉर्डिंग असलेली सीलबंद सीडी न्यायालयात यापूर्वीच जमा करण्यात आली होती. महत्त्वाचे म्हणजे, याच सीडीच्या आधारावर न्यायालयाने राहुल गांधी यांच्याविरोधात समन्स जारी केल्याचे सांगण्यात आले होते.

न्यायदंडाधिकारी शिंदे यांनी स्पष्ट सांगितले की, "हा युट्युब लिंक हा भारतीय पुरावा अधिनियम कलम ६५-बी नुसार आवश्यक असलेल्या प्रमाणपत्रासह सादर केलेला नाही. त्यामुळे, तो पुरावा म्हणून ग्राह्य धरता येणार नाही." इलेक्ट्रॉनिक रेकॉर्ड पुरावा म्हणून न्यायालयात ग्राह्य धरण्यासाठी कलम ६५-बी नुसार प्रमाणीकरण प्रमाणपत्र आवश्यक आहे.