Ravindra Chavan: 2 डिसेंबरपर्यंत युती टिकवायचीय म्हणत राजकीय भूकंपाचे संकेत, आता रवींद्र चव्हाणांनी 'तो' वादाचा मुद्दाच प्रचारात बाहेर काढला

Kolhapur News : राज्यात सर्वत्र स्थानिक स्वराज्य संस्थांच्या निवडणुकांचं जोरदार वारं वाहू लागले आहे. महायुती आणि महाविकास आघाडी यांनी निवडणुकांसाठी जंग जंग पछाडलं आहे. राजकीय आरोप-प्रत्यारोपांनी ही निवडणूक प्रचंड वादळी ठरते आहे. कोकण,मुंबईसह अनेक ठिकाणी भाजप प्रदेशाध्यक्ष रवींद्र चव्हाण (Ravindra Chavan) विरुद्ध शिवसेना असा वाद विकोपाला गेला आहे. मला 2 डिसेंबरपर्यंत युती टिकवायचीय म्हणत राजकीय भूकंपाचे संकेत दिल्यानंतर आता रवींद्र चव्हाण यांनी नगरपालिका आणि नगरपंचायतींच्या निवडणुकीत वादाचा मुद्दा बाहेर काढला आहे.

भाजप प्रदेशाध्यक्ष रवींद्र चव्हाण यांनी कोल्हापूर जिल्ह्यातील शिरोळ आणि कुरुंदवाड येथे शनिवारी(ता.29) महायुती आणि ताराराणी आघाडीच्या उमेदवारांच्या प्रचारसभेत मोठं विधान केलं. पंतप्रधान नरेंद्र मोदी यांनी कोरोना काळात लस करून मोफत उपलब्ध करून दिली, त्यामुळे आज आपण सर्वजण जिवंत आहोत, असं म्हटलं आहे.

शेतकऱ्यांच्या खात्यात प्रतिवर्षी 6 हजार रुपये जमा करणाऱ्या पीएम-किसान योजना, आयुष्यमान भारत आरोग्य कार्ड, तसेच कोरोना काळात उपलब्ध करून दिलेली लस अशा केंद्र सरकारच्या योजनांचा उल्लेखही यावेळी केला.

पंतप्रधान नरेंद्र मोदी (Narendra Modi) यांनी देशात कुणीही उपाशी राहू नये, म्हणून अन्न सुरक्षा योजना लागू करण्याचं काम केलं.त्याचमुळे जनतेनं केंद्र सरकारच्या योजनांचा लाभ लक्षात ठेवावा, असं म्हटलं. तसेच त्यांनी जरी निवडणूक नगर परिषदेची असली, तरी इथली सत्ता प्रामाणिकपणे काम करणाऱ्यांच्या हातात दिली पाहिजे. या परिषदांवर मुख्यमंत्री देवेंद्र फडणवीस यांचा आशीर्वाद असणार आहे,असा शब्दही प्रदेशाध्यक्ष रवींद्र चव्हाण यांनी नमूद केलं.

रवींद्र चव्हाण म्हणाले, केंद्रात नरेंद्र मोदी आणि राज्यात मुख्यमंत्री देवेंद्र फडणवीस यांच्या धोरणात्मक कामामुळे महाराष्ट्राच्या विकासाला नवी गती मिळाली आहे. राज्याचा प्रमुख प्रामाणिकपणे आणि जोरदार धोरणात्मक काम करत असेल, तर शहरांचा विकास वेगाने होतो. इथला विकास करायचा असेल, तर त्यासाठी मुख्यमंत्रीच अंतिम निर्णय घेऊ शकतात,” असे सांगत त्यांनी महायुतीच्या उमेदवारांना मतदान करण्याचे आवाहन केले.

काँग्रेस–राष्ट्रवादीच्या काळातील लोडशेडिंगची आठवण करून दिली. “त्या काळात दिवसाला सहा तास लोडशेडिंग व्हायचं. पण आज महाराष्ट्रात लोडशेडिंग नाही. हे बदल ओळखले पाहिजेत,” असे चव्हाण म्हणाले

तळकोकणातील मालवणमध्ये सध्या जोरदार राजकीय आरोप-प्रत्यारोप सुरू झाले असून येथे मुस्लिम मतदार, खोटे जात प्रमाणपत्राच्या आरोपनंतर आता शिंदेंच्या शिवसेनेचे आमदार निलेश राणे यांनी आणखी एक मोठा आरोप केला आहे. त्यांनी थेट भाजप प्रदेशाध्यक्ष रवींद्र चव्हाण यांचे नाव घेत त्यांनी पैसे वाटपाचे षडयंत्र रचल्याचा दावा केला आहे.

काही दिवसांपूर्वी केंद्रीय गृहमंत्री अमित शाह यांनी मुंबई दौऱ्यावर आलेले असताना भाजपाला राज्यात कुबड्यांची गरज नसून स्वबळावर निवडणुका लढविण्यास सक्षम असल्याचं म्हटलं होतं. शाह यांच्या विधानाचा योग्य अर्थ घेत राज्यातील भाजपाच्या नेत्यांनी स्थानिक स्वराज्य संस्थांच्या निवडणुकांकडे अधिक बारकाईने आणि जातीने लक्ष घालून गुलाल आपल्याच अंगाला लागेल याची आक्रमकपणे आखणी केली आहे. याचवेळी आता रवींद्र चव्हाण यांनीही भाजप शिवसेना वादावर आम्हांला 2 डिसेंबरपर्यंत युती टिकवायची असं विधान केलं आहे. यामुळे आता नवा वाद पेटला आहे.