Ravindra Dhangekar: धंगेकरांचं नेमकं काय गंडलंय? 'महायुती'नं राखलंय अंतर, मदतीला धावून आला 'मविआ'चा जुना मित्र

Ravindra Dhangekar: गेल्या काही दिवसांपासून पुण्यातील वाढत्या गुन्हेगारीवरून उपमुख्यमंत्री एकनाथ शिंदे यांच्या शिवसेनेचे महानगरप्रमुख रवींद्र धंगेकर सातत्याने सरकारला आणि भाजपच्या नेत्यांना प्रश्न विचारत आहेत. यामुळे भाजप विरुद्ध धंगेकर असा संघर्ष रंगला असल्याचा पाहायला मिळत आहे. धंगेकर हे सातत्याने पुण्याच्या गुन्हेगारीवर बोलत असताना त्यांच्या बाजूने महायुतीतील कोणता नेता अथवा त्यांच्या स्वपक्षातील ना वरिष्ठ ना स्थानिक नेते त्यांच्यासोबत उभे राहिले. उलट त्यांच्या पक्षाचे प्रमुख नेते असलेले एकनाथ शिंदे यांनी देखील धंगेकरांना महायुतीतील दंगे बंद करा अशा सूचना दिल्या आहेत. त्यामुळे महायुतीत असून देखील एकटे पडलेल्या धंगेकरांना आपल्या महाविकास आघाडीतील जुन्या नेत्यांची सोबत मिळत असल्याचं चित्र सध्या पाहायला मिळत आहे.

धंगेकरांनी उपस्थित केलेल्या मुद्द्यांवर राष्ट्रवादी काँग्रेस शरदचंद्र पवार पक्षाचे आमदार रोहित पवार हे सातत्याने धंगेकरांच्या बाजूने मैदानात उतरताना पाहायला मिळत आहेत. सोबतच महाविकास आघाडीतील शिवसेना उद्धव बाळासाहेब ठाकरे पक्षाच्या नेता सुषमा अंधारे देखील रवींद्र धंगेकर यांच्या गुन्हेगारी बाबतचा मुद्दा योग्यच असल्याचं सांगत आहेत. त्यानंतर ज्या पक्षामधून रवींद्र धंगेकर हे आमदार झाले होते, त्या काँग्रेसनं देखील त्यांना आपला पाठिंबा दर्शवला आहे. रवींद्र धंगेकर हे पुणेकरांच्या विषयांवर बोलत असून त्याबाबत आम्ही त्यांच्या पाठीशी आहोत, अशीच भूमिका काँग्रेसचे शहराध्यक्ष अरविंद शिंदे यांनी व्यक्त केली आहे.

अरविंद शिंदे म्हणाले, "काँग्रेसमध्ये असताना त्यांना कोणीही काही बोललं नाही किंवा अडवलं नाही. पण आता त्यांना दंगा नको म्हणून सांगितलं जात आहे. त्यामुळे त्यांची काही प्रमाणात महायुतीत गोची होत असल्याचं दिसतेय. धंगेकर पुणेकरांबाबत प्रश्न विचारत आहेत. त्यामुळे मंत्री चंद्रकांत पाटील आणि केंद्रीय मंत्री खासदार मुरलीधर मोहोळ यांनी याला उत्तर द्यावं," असं स्पष्ट मत अरविंद शिंदे यांनी व्यक्त केलं आहे. धंगेकर हे पुणेकरांच्या मुद्द्यावरून प्रश्न विचारत असून त्यांचे मुद्दे रास्ता असून काँग्रेसचा त्यांच्या मुद्द्यांना पाठिंबा असल्याचे अरविंद शिंदे यांनी जाहीर केलं आहे.

एकूणच एकीकडे सध्या महायुतीमध्ये एकटे पडलेल्या धंगेकरांना दुसरीकडे महाविकास आघाडीच्या नेत्यांची साथ मिळत असल्याने कुठेतरी धंगेकरांचा शिंदेंच्या शिवसेनेमध्ये पक्ष प्रवेश करण्याचा निर्णय चुकला की काय? अशी कुजबूज सध्या धंदेकरांच्या समर्थकांमध्ये सुरू असल्याचं पाहायला मिळत आहे.