Sushma Andhare: सुषमा अंधारेंचा सर्वात मोठा दावा; म्हणाल्या,'फडणवीसांपेक्षा अजितदादा मुख्यमंत्री...'

Pune News : सध्या राज्याच्या राजकारणामध्ये हनी ट्रॅप आणि कृषी मंत्री माणिकराव कोकाटे यांचा रमी खेळताना चा व्हिडिओ समोर आल्याने मोठ्या प्रमाणात खळबळ उडाली आहे. विरोधकांकडून या गोष्टीवरून सत्ताधाऱ्यांना लक्ष करण्यात येत आहे. अशातच शिवसेना उद्धव बाळासाहेब ठाकरे पक्षाच्या नेत्या सुषमा अंधारे (Sushma Andhare) यांनी उपमुख्यमंत्री अजित पवार यांचे कौतुक करत मुख्यमंत्री देवेंद्र फडणवीस यांच्यावर टीका केली आहे. अजित पवार हे देवेंद्र फडणवीसांपेक्षा चांगले मुख्यमंत्री होतील, असं अंधारे म्हणाल्या आहेत.

सुषमा अंधारे यांनी मंगळवारी(ता.22) पुण्यामध्ये माध्यमांशी राज्यातील विविध विषयांवर भाष्य केलं. यावेळी कृषी मंत्री कोकाटे यांच्या रमी प्रकरणावर बोलताना अंधारे म्हणाल्या , विधानसभेतील कामकाजासाठी पर सेकंद 4 हजार 700 रुपये खर्च होतात. हे पैसे सामान्य लोकांनी भरलेल्या टॅक्स मधून येतात. त्यामुळे त्या लोकांचे प्रश्न सोडवण्यासाठी अधिवेशन घेण्यात येतं. रमी खेळण्यासाठी नसल्याचा टोलाही अंधारेंनी लगावला.

सुषमा अंधारे म्हणाल्या, यावर जर माणिकराव कोकाटे हे आम्हाला कोर्टामध्ये खेचण्याची भाषा करत असतील, तर त्यापूर्वी त्यांनी हे लक्षात घ्यावं की, ते ज्या ठिकाणी बसले होते, त्या ठिकाणी सत्ताधारी मंडळी बसण्याची जागा आहे. त्यामुळे तुमचा व्हिडिओ हा कोणत्या सत्ताधारी आमदाराने रेकॉर्ड केला. याचा शोध कोकाटे यांनी घ्यायला हवा. त्यातून कोकाटेंना अंदाज येईल की, तुमचीच माणसं, तुमची माती करायला बसली आहेत, अशी कडाडून टीकाही सुषमा अंधारे यांनी यावेळी केली.

माणिकराव कोकाटे यांच्या कृतीवर जर कोणी प्रश्न विचारायला जात असेल तर प्रतिकात्मक आंदोलन करणे हा त्यांचा अधिकार आहे. लातूरमध्ये जर छावा संघटनेने पत्ते फेकून आंदोलन केलं असेल, तर ती प्रतिकात्मक कृती आहे. या प्रतिकात्मक कृतीला लोकशाही पद्धतीनं घेणं आवश्यक असताना त्यांना मारहाण केली गेली, हे अतिशय चुकीचं असल्याचंही अंधारे यांनी ठणकावलं.

तरीदेखील उपमुख्यमंत्री अजित पवार यांचे मी कौतुक करेल आणि आभार मानेल, कारण अजित पवार आणि देवेंद्र फडणवीस यांच्या वागण्या-बोलण्यात मला फरक जाणवला आहे. संभाजी ब्रिगेडच्या प्रवीण गायकवाड यांच्यावर हल्ला झाल्यानंतर हल्ला करणाऱ्या काटेबाबत देवेंद्र फडणवीस यांनी कोणतीही भूमिका घेतली नाही. तसेच चंद्रशेखर बावनकुळे यांनी काटे याची पाठराखण करण्याची भूमिका घेतली.

मात्र, दुसरीकडे अजित पवार यांनी आपल्या युवक प्रदेशाध्यक्षाची तत्काळ हकालपट्टी केली. या अर्थाने दादा हे अधिक लोकशाहीवादी आहेत. त्यामुळे दादांचं कौतुक केलं पाहिजे. तसंच भाजप, देवेंद्र फडणवीस आणि बावनकुळे यांनी अजित पवार यांच्याकडून शिकलं पाहिजे, असा खोचक टोला सुषमा अंधारे यांनी लगावला.

अजित पवार यांच्या वाढदिवसानिमित्त भावी मुख्यमंत्री म्हणून जे बॅनर लागले आहेत. ते योग्य आहेत. कारण फडणवीसांपेक्षा अजित पवार हे मुख्यमंत्री पदाची धुरा चांगल्या पद्धतीने सांभाळू शकतील, असा मोठा दावाही सुषमा अंधारे यांनी केला आहे.