पेट्रोल, डिझेलच नव्हे तर सीएनजीवर गाडी चालवणंही आता झालं महाग

नवी दिल्ली : देशात सध्या महागाईचा भडका उडाला आहे. पेट्रोल (Petrol) आणि डिझेलच्या (Petrol) दरवाढीमुळे नागरिक त्रस्त झाले आहेत. यामुळे स्वस्त इंधन पर्याय म्हणून वाहनचालकांकडून सीएनजीला (CNG)पसंती दिली जात होती. आता सीएनजीवर गाडी चालवणेही महाग झाली आहे. सीएनजीच्या प्रतिकिलो 2.28 रुपयांची वाढ करण्यात आली आहे. सरकारने नैसर्गिक वायूच्या दरात मोठी वाढ केल्याने सीएनजी महागला आहे.

सीएनजीच्या दरात दिल्ली आणि परिसरात वाढ करण्यात आली आहे. दिल्लीत ही वाढ प्रतिकिलो 2.28 रुपये असून, गाझियाबाद, नोएडा आणि ग्रेटर नोएडामध्ये ही वाढ प्रतिकिलो 2.55 रुपये आहे. केंद्र सरकारने नैसर्गिक वायूच्या दरात तब्बल 62 टक्के वाढ केली आहे. यामुळे सीएनजीच्या दरात वाढ करण्यात आली आहे. दिल्लीत सीएनजीचा दर प्रतिकिलो 47.48 रुपयांवर पोचला आहे. यामुळे स्वस्त इंधनाचा पर्याय म्हणून सीएनजीकडे वळणाऱ्या वाहनचालकांना भुर्दंड बसू लागला आहे.

देशभरात आज पेट्रोलच्या दरात प्रतिलिटर 25 पैसे तर डिझेलच्या दरात 30 पैसे वाढ करण्यात आली. सध्या देशात इंधनाचे दर ऐतिहासिक उच्चांकी पातळीवर पोचले आहेत. पेट्रोलच्या दराने देशभरात शंभरी ओलांडली होती. आता डिझेलच्या दरानेही शंभरी ओलांडण्यास सुरवात केली आहे. अशातच स्वयंपाकाच्या गॅस सिलिंडरच्या (LPG Cylinder) दरातही वाढ सुरू आहे. चालू वर्षात एलपीजी सिलिंडरच्या दरात तब्बल 190 रुपयांची वाढ झाली आहे. दिल्ली आणि मुंबईत विनाअंशदानित गॅस सिलिंडरची किंमत 884.50 रुपयांवर पोचली आहे.

दिल्लीत आज पेट्रोलचा दर 102.14 रुपये तर मुंबईत 108.19 रुपयांवर गेला आहे. डिझेलचा दर दिल्लीत 90.47 रुपये आणि मुंबईत 98.16 रुपयांवर पोचला आहे. देशातील चार राज्ये व एका केंद्रशासित प्रदेशातील विधानसभा निवडणुकीच्या निकाल लागल्यानंतर 2 मेपासून सातत्याने पेट्रोल आणि डिझेलच्या दरात वाढ होत आहे. यामुळे सामान्य नागरिकांना इंधन दरवाढीचे चटके बसत आहेत. देशात 4 मे ते 17 जुलै या कालावधीत पेट्रोलच्या दरात 11.44 रुपये आणि डिझेलच्या दरात 9.14 रुपये वाढ झाली आहे.