अनिल परबांनी सोमय्यांना दिलेला इशारा खरा करून दाखवला!

मुंबई : महाविकास आघाडीतील मंत्र्यांवर सातत्यानं निशाणा साधणारे भाजप नेते किरीट सोमय्या यांच्या अडचणी वाढण्याची शक्यता आहे. सोमय्या यांनी परिवहन मंत्री अनिल परब यांच्यावर अनेक गंभीर आरोप केले आहेत. त्यावरून परब यांनी त्यांना कायदेशीर नोटीस पाठवत माफी मागण्यास सांगितले होते. पण सोमय्या यांनी माफी न मागितल्यानं अखेर परब यांनी मोठं पाऊल उचललं आहे.

अनिल परब यांना नुकतीच सक्तवसुली संचालनालयाची (ईडी) नोटीस आली होती. पण नियोजित कार्यक्रमांचे कारण देत परब चौकशीला सामोरे गेले नाहीत. मनी लाँर्डिंग प्रकरणात ईडीकडून परब यांचीही चौकशी केली जाणार आहे. मुंबईचे माजी पोलिस आयुक्त परमबीरसिंग यांनी माजी गृहमंत्री अनिल देशमुख यांच्यावर 100 कोटी रुपयांच्या वसुलीचे आरोप केले आहेत. या प्रकरणात परब यांचाही हात असल्याचा गंभीर आरोप सोमय्या यांनी केला आहे.

तसेच परिवहन विभागातही परब यांनी वसुली केल्याचा सोमय्या यांनी आरोप केले आहेत. परिवहन विभागातील अधिकारी बजरंग खरमाटे व वरिष्ठ अधिकाऱ्यांमार्फत पैसे वसुली करून परब यांना दिले जात असल्याचा तसेच दापोली येथील परबांचे हॉटेल या प्रकरणांवर सोमय्या यांनी गंभीर आरोप केले आहेत.

त्यानंतर परब यांनी सोमय्या यांना माफी मागण्यास सांगितले होते. परब यांनी अब्रुनुकसानीचा दावा दाखल करण्याचा इशारा सोमय्या यांना दिला होता. पण सोमय्या यांनी माफी मागितली नाही. त्यानंतर मंगळवारी परब यांनी सोमय्या यांच्याविरोधात मुंबई उच्च न्यायालयात 100 कोटी रुपयांचा अब्रुनुकसानीचा दावा दाखल केला आहे. याबाबत त्यांनी ट्विटरवरून माहिती दिली आहे.

'किरीट सोमय्या यांनी माझी बदनामी व मानहानी केल्याबद्दल मी त्यांना कायदेशीर नोटीस देऊन ७२ तासांत माफी मागण्याचे सूचित केले होते. परंतु त्यांनी माफी मागितली नसल्याने मी आज किरीट सोमय्या यांच्या विरोधात मा. उच्च न्यायालयात १०० कोटी रुपयांचा अब्रूनुकसानीचा दावा दाखल केला आहे,' असं परब यांनी ट्विटमध्ये म्हटलं आहे.