Punjab Assembly elections : 'आप'कडून भाजप, काँग्रेसला धक्का; भगवंत मान यांना धुरीमधून उमेदवारी, जेलमध्ये असलेला नेताही यादीत...

AAP candidate list : पंजाबमध्ये सत्ता काबीज करण्यासाठी भाजपसह काँग्रेसने कंबर कसली आहे. तर सत्ताधारी आम आदमी पक्षाने सत्ता कायम ठेवण्यासाठी आपली ताकद पणाला लावली आहे. पुढील वर्षी होणाऱ्या विधानसभा निवडणुकीसाठी सर्व पक्ष कामाला लागलेले असताना आपने भाजप आणि काँग्रेसला धक्का दिला आहे. पक्षाने काही महिने आधीच ४० उमेदवारांची पहिली यादी जाहीर केली आहे.

आपच्या पहिल्या उमेदवारी यादीत मुख्यमंत्री भगवंत मान यांना धुरी मतदारसंघातून उमेदवारी देण्यात आली आहे. २०२२ च्या निवडणुकीत ते याच मतदारसंघातून मोठ्या मताधिक्याने विजयी झाले होते. यादीमध्ये मंत्री संजीव अरोरा यांचेही नाव आहे. सध्या ते एका प्रकरणात तुरुंगात असून त्यांना लुधियाना पश्चिममधून उमेदवारी देण्यात आली आहे.

पहिल्या यादीत ३७ विद्यमान आमदारांना पुन्हा संधी देण्यात आली आहे. त्यामध्ये काही मंत्र्‍यांचाही समावेश आहे. पंजाब विधानसभेच्या ११७ जागा आहेत. त्यापैकी ४० जागांवर उमेदवार जाहीर करत आपने विरोधकांवर सुरूवातीला मोठी आघाडी घेतली आहे. त्यामुळे संबंधित उमेदवारांना आपल्या मतदारसंघात प्रचाराला मोठा कालावधी मिळणार आहे.

'आप'ने २०२२ च्या निवडणुकीत ११७ पैकी तब्बल ९२ जागांवर विजय मिळवत राज्यात पहिल्यांदाच सत्ता काबीज केली होती. मतदारांनी या निवडणुकीत सत्ताधारी काँग्रेससह अकाली दल आणि भाजपलाही नाकारले होते. आपच्या लाटेसमोर सर्वच विरोधी पक्षांचा सुपडा साफ झाला होता. आता पुन्हा एकदा आपने मान यांच्या नेतृत्वाखाली सत्ता काबीज करण्यासाठी कंबर कसली आहे.

दरम्यान, विविध मतदारसंघातील सर्व्हे आणि लोकांकडून मिळालेल्या प्रतिसादानंतरच ४० उमेदवारांची नावे अंतिम करण्यात आल्याचे मान यांनी यापूर्वी सांगितले होते. त्यानुसार आज या उमेदवारांची नावे जाहीर करण्यात आली आहेत. मात्र, पहिल्या यादीत नाव न आलेल्या ५२ विद्यमान आमदारांचे टेन्शन आता वाढले आहे. त्यांना उमेदवारासाठी आता जोरदार फिल्डींग लावाली लागणार असल्याचे दिसते.