सर्वोच्च न्यायालयानं सुनावताच सरकारनं शाळांबाबत घेतला मोठा निर्णय

नवी दिल्ली : देशाची राजधानी दिल्लीतील वायू प्रदूषणाच्या (Delhi Pollution) भीषण समस्येवर सर्वोच्च न्यायालयाने (Supreme Court) कडक पवित्रा घेतला आहे. मोठी माणसे वर्क फ्रॉम होम करीत असताना मुलांना शाळा सुरू केल्याबद्दल सरन्यायाधीश एन.व्ही.रमणा (N.V.Ramana) यांनी सरकारला फटकारले आहे. यानंतर तातडीने दिल्ली सरकारने शाळा बंद करण्याचा निर्णय घेतला आहे.

दिल्लीतील प्रदूषणामुळे बांधकामांना बंदी घालण्यात आली आहे. यावरील याचिकेवर सर्वोच्च न्यायालयात सुनावणी सुरू आहे. या वेळी सर्वोच्च न्यायालयाने शाळा सुरू केल्याबद्दल दिल्ली सरकारला खडसावले. न्यायालय म्हणाले की, शहरातील प्रदूषणाची पातळी वाढत असताना शाळा सुरू करण्यात आल्या आहेत. अधिकारी कर्मचाऱ्यांना घरून काम करण्याचे आदेश दिले आहेत आणि लहान मुलांसाठी शाळा तुम्ही सुरू करीत आहात. सरकारी पातळीवर काही उपाययोजना होताना दिसत नाहीत.

यानंतर दिल्ली सरकार खडबडून जागे झाले आहे. उद्यापासून तातडीने शाळा बंद करण्याचा निर्णय दिल्ली सरकारने घेतला आहे. याबद्दल बोलताना दिल्लीचे आरोग्यमंत्री गोपाल राय म्हणाले की, दिल्लीतील सर्व शाळा उद्यापासून पुढील आदेश मिळेपर्यंत बंद राहतील. शहरातील वाढत्या प्रदूषणामुळे हा निर्णय घेण्यात आला आहे.

दिल्लीतील शाळा-महाविद्यालये 29 नव्हेंबरपासून पुन्हा सुरू करण्याचा निर्णय राज्य सरकारने घेतला. प्रदूषणाची पातळी वाढल्याने दिल्ली सरकारने 21 नोव्हेंबरपासून शाळा बंद केल्या होत्या. आता हवेची गुणवत्ता सुधारत असल्याने शाळा पुन्हा सुरू करण्यात येतील, असे सरकारने जाहीर केले होते. त्याचप्रमाणे सरकारी कर्मचाऱ्यांसाठीचा वर्क फ्रॉम होमचा आदेशही मागे घेण्यात येईल, असे म्हटले होते.

मागील सुनावणीवेळी सरन्यायाधीश रमणा म्हणाले होते की, प्रदूषणाच्या समस्येवर उपायांबाबत जनेतच्या अनेक अपेक्षा आहेत. न्यायालये काम करत आहेत आणि सरकार काही करत नाही, अशी भावना आहे. खरी समस्या हीच आहे. न्यायालयाच्या उपाययोजनांनंतर प्रदूषणाची पातळी 40 टक्क्यांनी घटल्याच्या बातम्या आल्या असून, त्यातील सत्यता माहिती नाही. मात्र या मुद्यावर आम्ही सुनावणी कायम ठेवू.