Rahul Gandhi : त्यांनी आमच्या निळ्या क्रांतीला फॅशन शो बनवला... हा नेता राहुल आणि प्रियंका गांधींवर भडकला

Delhi News : केंद्रीय गृहमंत्री अमित शहा यांनी डॉ बाबासाहेब आंबेडकर यांच्या बाबत संसदेत केलेल्या वक्तव्या विरोधात आज देशभरात काँग्रेसकडून निदर्शने करण्यात येत आहेत.  एकीकडे कॉग्रेस आक्रमक झाली असताना उत्तरप्रदेशच्या माजी मुख्यमंत्री मायावती यांचे पुतणे आकाश आनंद यांनी कॉग्रेस नेते राहुल गांधी आणि प्रियंका गांधींवर निशाणा साधला आहे.

बहुजन समाज पार्टी (BSP) अध्यक्ष मायावती यांचे पुतणे आणि BSP राष्ट्रीय समन्वयक आकाश आनंद म्हणाले की, कोट्यवधी शोषित, वंचित आणि गरिबांसाठी बाबासाहेब आंबेडकर हेच देव आहेत. मात्र त्यांच्या नावाचा मतांसाठी वापर करणे ही आजकाल फॅशन झाली आहे.

आधी देशाचे गृहमंत्री अमित शहा यांनी संसदेत बाबासाहेब आंबेडकर यांचा अपमान केला,  आणि आता राहुल गांधी आणि प्रियंका गांधी यांनी आमच्या निळ्या क्रांतीला फॅशन शो बनवले आहे.  तसेच दिल्लीचे माजी मुख्यमंत्री  अरविंद केजरीवाल यांनी बाबासाहेबांच्या प्रतिमेशी छेडछाड केली असल्याचा आरोप आकाश आनंद यांनी केला. 

मात्र देशातील दलित, शोषित, वंचित आणि उपेक्षित लोकांच्या स्वाभिमानासाठी बसपचे मिशन सुरू राहील. तसेच गृहमंत्री अमित शहा यांना त्यांनी केलेल्या वक्तव्याचा पश्चाताप करावा लागेल. आज दिल्लीत बसपाचंही निदर्शनं आहे. पक्ष आज दुपारी 1 वाजता लखनौमध्ये आंदोलन सुरू करेल आणि त्यानंतर राष्ट्रपतींना उद्देशून एक निवेदन डीएमला सादर केले जाईल. असं आकाश आनंद यांनी सांगितले. 

काय म्हणाले अमित शहा ? 

17 डिसेंबरला संसदेत अमित शहांच्या भाषणानंतर हा वाद सुरू झाला. राज्यसभेत संविधानावरील चर्चेदरम्यान बोलताना केंद्रीय गृहमंत्री शाह आंबेडकरांनी जवाहरलाल नेहरूंच्या मंत्रिमंडळातून राजीनामा दिल्याबद्दल बोलत होते. या भाषण दरम्यान अमित शहा म्हणाले, “आता ही फॅशन झाली आहे… आंबेडकर, आंबेडकर, आंबेडकर, आंबेडकर, आंबेडकर, आंबेडकर. देवाचे एवढे नाव घेतले असते तर सात जन्म स्वर्गात गेला असता.