Alex Sequera News : आलेक्स सिक्वेरांचा मोठे विधान; म्हणाले, 'मला मंत्रिपदावरून हाकलून लावावे, अशी अनेकांची इच्छा'

Madgaon News : 'मी मंत्रिपदावर असलेलो कित्येकांना खटकते. मला मंत्रिपदावरून हाकलून लावावे, अशी कित्येकांची इच्छा आहे आणि त्यामुळेच अशा व्यक्ती माझ्यामागे लागलेल्या सतत दिसतात', अशी प्रतिक्रिया कायदा व पर्यावरणमंत्री आलेक्स सिक्वेरा यांनी बुधवारी व्यक्त केली.

सिक्वेरा यांना मंत्रिपदावरून काढणार अशा आशयाचे वृत्त कित्येकवेळा ऐकू येत आहे. या पार्श्वभूमीवर सिक्वेरा यांनी वरील प्रतिक्रिया व्यक्त केली. नुकत्याच संपलेल्या सेंट फ्रान्सिस झेवियर पवित्र अवशेष प्रदर्शनाच्यावेळी सिक्वेरा यांच्या नेतृत्वाखाली चांगली कामगिरी केली गेली, याबद्दल त्यांचे अभिनंदन करण्यासाठी सासष्टीच्या काही प्रमुख नागरिकांनी बुधवारी त्यांची भेट घेतली. त्यानंतर प्रसारमाध्यमांशी बोलताना सिक्वेरा यांनी आपले मत व्यक्त केले.

सेंट फ्रान्सिस झेवियर यांच्याविरोधात सुभाष वेलिंगकर यांनी आक्षेपार्ह विधान केल्यामुळे त्यांना अटक करा, अशी मागणी घेऊन रस्त्यावर उतरलेल्या आंदोलकांवर जी आरोपपत्रे दाखल केली आहेत. त्यामागे आपला कुठलाही हात नसल्याचा खुलासा सिक्वेरा यांनी परत एकदा केला.

राज्यात गेल्या काही दिवसांपासून मंत्रिमंडळ फेरबदलाच्या चर्चा सुरु आहेत. विद्यमान मंत्र्यापैकी ज्यांना नारळ दिला जाण्याची शक्यता आहे, त्यात सिक्वेरा यांचे नाव घेतले जाते. याबाबत अनेकवेळा वृत्त समोर आले आहे. सिक्वेरा यांच्या मतदारसंघात भाजप (Bjp) सदस्य नोंदणी कमी झाल्याने प्रदेशाध्यक्ष सदानंद तानावडे नाराज असल्याचे सांगितले जात आहे. दरम्यान, सिक्वेरांनी हा दावा खोडून काढला आहे.

राज्यात मंत्रिमंडळ फेरबदलांच्या चर्चांना आलेले ऊत मुख्यमंत्री डॉ. प्रमोद सावंत (Pramod Sawant) यांच्या वक्तव्याने पुन्हा एकदा थांबले आहे. आता मंत्रिमंडळ फेरबदल होणार नाही, असे सावंत म्हटल्याने या चर्चांना तात्पुरता का होईना पूर्णविराम मिळाल्याची चर्चा आहे.