मोठी बातमी! बहिणींच्या खात्यात 10 हजारांची ओवाळणी! मुख्यमंत्र्यांची 25 लाख महिलांना विशेष भेट; महिला मालामाल!

लाडक्या बहिणींसाठी मोठी आनंदाची बातमी समोर आली आहे. राज्यातील तब्बल 25 लाख महिलांच्या बँक खात्यात प्रत्येकी 10 हजार रुपयांची रक्कम जमा करण्यात आली आहे. बिहारचे मुख्यमंत्री नीतीश कुमार यांनी मुख्यमंत्री महिला रोजगार योजनेअंतर्गत हा विशेष आर्थिक लाभ महिलांना दिला आहे. या निर्णयामुळे लाखो कुटुंबांना मोठा दिलासा मिळाला आहे.

या योजनेत सुमारे 22 लाख ग्रामीण भागातील तर जवळपास 3 लाख शहरी भागातील महिलांचा समावेश आहे. लाभार्थी महिलांच्या खात्यात थेट 10 हजार रुपये हस्तांतरित करण्यात आले. संबंधित विभागाने यासाठीची सर्व प्रक्रिया पूर्ण केली असल्याची माहिती अधिकाऱ्यांनी दिली होती.

मुख्यमंत्री रोजगार योजनेअंतर्गत एकूण 25 लाख महिलांच्या खात्यात तब्बल 2500 कोटी रुपये पाठवण्यात आले आहेत. आतापर्यंत जवळपास 1.81 कोटी महिलांना रोजगारासाठी आर्थिक मदत मिळाल्याचे सांगितले जात आहे. राजधानीत आयोजित विशेष कार्यक्रमात मुख्यमंत्री नीतीश कुमार यांच्या हस्ते ही रक्कम ऑनलाईन पद्धतीने वितरित करण्यात आली. राज्यातील सर्व जिल्हा मुख्यालयांवरही जिल्हास्तरीय कार्यक्रमांचे आयोजन करण्यात आले होते.

या कार्यक्रमाला उपमुख्यमंत्री सम्राट चौधरी यांचीही उपस्थिती होती. ग्रामीण विकास मंत्री श्रवण कुमार यांनी सांगितले की, महिलांच्या खात्यात थेट आर्थिक मदत जमा करण्याच्या बाबतीत बिहार हे देशातील पहिले राज्य ठरले आहे. काही तांत्रिक कारणांमुळे ज्यांच्या खात्यात रक्कम जमा होऊ शकली नव्हती, अशा महिलांनाही आता निधी पाठवण्यात आल्याचे त्यांनी स्पष्ट केले.

मुख्यमंत्री महिला रोजगार योजनेअंतर्गत आतापर्यंत 1.56 कोटी महिलांना प्रत्येकी 10 हजार रुपये देण्यात आले आहेत. हा निधी महिलांनी स्वतःचा लघुउद्योग किंवा रोजगार सुरू करण्यासाठी वापरावा, असा उद्देश आहे. शहरी भागातील 12 लाखांहून अधिक अर्जांची पडताळणी प्रक्रिया सध्या सुरू आहे. नगरपालिकांच्या माध्यमातून ही तपासणी केली जात असून पुढील 15 दिवसांत ती पूर्ण होण्याची शक्यता आहे.