काँग्रेसनं भाजपला अस्मान दाखवलं! मुख्यमंत्र्यांच्या जिल्ह्यातच चारली धूळ

बंगळूर : कर्नाटकात (Karnataka) दोन विधानसभा मतदारसंघात पोटनिवडणुका झाल्या. या पोटनिवडणुकांत मुख्यमंत्री बसवराज बोम्मई (Basavraj Bommai) यांना त्यांच्या जिल्ह्यातच मोठा धक्का बसला आहे. हनगळमध्ये काँग्रेसचे (Congress) श्रीनिवास माने (Srinivas Mane) विजयी झाले असून, भाजपचा (BJP) उमेदवार पराभूत झाला आहे. बोम्मई हे मुख्यमंत्री झाल्यानंतर राज्यात झालेली ही पहिलीच निवडणूक होती.

कर्नाटकात सिंदगी आणि हनगळ या विधानसभा मतदारसंघात पोटनिवडणुका झाल्या होत्या. यातील हनगळची जागा भाजपकडे तर सिंदगीची जागा धर्मनिरपेक्ष दलाकडे (जेडीएस) होती. हनगळचे आमदार सी.एम.उदासी यांच्या निधनाने ही जागा रिक्त झाली होती. जेडीएसचे एम.सी.मानगुळी यांच्या निधनाने सिंदगीची जागा रिक्त जागा झाली होती. या जागांसाठी भाजपसह काँग्रेस आणि जेडीएसने जोर लावला होता. आज या पोटनिवडणुकांचे निकाल जाहीर झाले.

राज्यात पुढील वर्षी विधानसभा निवडणूक होत असल्याने बोम्मई यांच्यासाठी या पोटनिवडणुका नेतृत्वावर शिक्कामोर्तब करणाऱ्या होत्या. परंतु, त्यांना फटका बसला आहे. हनगळ हा मुख्यमंत्र्याच्या जिल्ह्यातील मतदारसंघ आहे. येथून काँग्रेसचे श्रीनिवास माने विजयी झाले. भाजप दुसऱ्या तर जेडीएस तिसऱ्या क्रमांकावर राहिला. सिंदगीमध्ये भाजपने विजय मिळवला आहे. येथे भाजपचे उमेदवार रमेश भुसानूर हे 31 हजार 185 मतांनी विजयी झाले. दुसऱ्या क्रमांकावर काँग्रेसचे अशोक मानगुळी होते. भुसानूर यांनी 93 हजार 856 तर मानगुळी यांना 62 हजार 680 मते मिळाली.

येडियुरप्पांच्या रुपाने दक्षिणेत भाजपचा पहिला मुख्यमंत्री झाला होता. येडियुरप्पांची मुख्यमंत्रिपदाची ही चौथी टर्म होती. त्यांच्या चौथ्या टर्ममधील मुख्यमंत्रिपदाच्या कार्यकाळाला दोन वर्षे पूर्ण झाल्यानिमित्त कार्यक्रम आयोजित करण्यात आला होता. याच कार्यक्रमात येडियुरप्पांनी राजीनाम्याची घोषणा केली होती. त्यांच्या राजीनाम्यानंतर मुख्यमंत्रिपदासाठी बोम्मई यांच्या नावाची घोषणा करण्यात आली होती. बोम्मई हे येडियुरप्पा यांच्या अत्यंत जवळचे मानले जातात. येडियुरप्पा यांच्या संमतीनेच त्यांची निवड झाली होती.