Amit Shah BJP Manifesto : ममता बॅनर्जींच्या बालेकिल्ल्याला खिंडार पाडण्यासाठी भाजप सज्ज; 'या' 5 घोषणा ठरणार गेम चेंजर!

भाजपने पश्चिम बंगाल निवडणुकीसाठी मोठी रणनीती आखत केंद्रीय गृहमंत्री अमित शाह यांनी कोलकत्यात अयोजित कार्यक्रमात हा जाहीरनामा आपला जाहीरनामा सादर केला. या जाहीरनाम्याला 'भरोसा पत्र' असे नाव देण्यात आले आहे. या भरोसा पत्रात महिला, युवक आणि बेरोजगार अशा प्रमुख मतदार गटांवर विशेष लक्ष केंद्रित करण्यात आले आहे.

अमित शाह यांनी सांगितले की, हा जाहीरनामा राज्यातील बेरोजगार युवक आणि महिलांना नवी दिशा देणारा ठरेल. त्यांनी ममता बॅनर्जी यांच्या नेतृत्वाखालील सरकारवर टीका करत म्हटले की, गेल्या काही वर्षांत जनतेच्या अपेक्षा पूर्ण झालेल्या नाहीत. त्यामुळे आता बंगालमध्ये बदलाची गरज निर्माण झाली आहे.

भाजपने आपल्या आश्वासनांमध्ये महिलांसाठी मोठी आर्थिक मदत जाहीर केली आहे. प्रत्येक महिन्याच्या 1 ते 5 तारखेच्या दरम्यान महिलांच्या खात्यात 3000 रुपये जमा केले जातील, असे सांगण्यात आले. तसेच बेरोजगार युवकांनाही दरमहा 3000 रुपये भत्ता देण्याचे आश्वासन देण्यात आले आहे.

याशिवाय, राज्यात 1 कोटी रोजगार आणि स्वयंरोजगाराच्या संधी निर्माण करण्याचा निर्धार व्यक्त करण्यात आला आहे. औद्योगिक विकासासाठी पहिल्या 100 दिवसांत ठोस रोडमॅप तयार केला जाईल, असेही सांगण्यात आले. दार्जिलिंग चहाला जागतिक स्तरावर प्रसिद्ध करण्यासाठी विशेष प्रयत्न करण्यात येणार आहेत.

सुरक्षेच्या मुद्द्यावरही भाजपने कठोर भूमिका घेतली आहे. सीमांवर घुसखोरी रोखण्यासाठी ‘zero tolerance’ धोरण राबवले जाईल आणि सीमा अधिक सुरक्षित केल्या जातील. तसेच, जनतेला आरोग्य सुविधा देण्यासाठी आयुष्मान भारतसारख्या सर्व केंद्र सरकारच्या योजना राज्यात लागू केल्या जातील.

भ्रष्टाचार आणि माफिया राज संपवण्यासाठी ठोस पावले उचलली जातील, असेही अमित शाह यांनी स्पष्ट केले. तसेच, राज्यातील सरकारी नोकऱ्यांमध्ये महिलांना 33 टक्के आरक्षण देण्याचे आश्वासन देण्यात आले आहे. आता या आश्वासनांवर बंगालमधील जनता किती विश्वास ठेवते आणि निवडणुकीत कोणाला संधी देते, हे पाहणे महत्त्वाचे ठरणार आहे.