यास्मिन वानखेडे मैदानात, मलिकांविरोधात राष्ट्रीय महिला आयोग आणि पोलिसांकडे तक्रार

मुंबई : क्रूज ड्रग्ज पार्टी प्रकरणात अमली पदार्थविरोधी विभागाचे (NCB) विभागीय संचालक समीर वानखेडे (Sameer Wankhede) हे सध्या चांगलेच अडचणीत आले आहेत. वानखेडे यांची खात्यांतर्गत चौकशी सुरू झाल्याचे एनसीबीने जाहीर केले होते. अशातच आता मुंबई पोलिस देखील या आरोपांची चौकशी करणार आहेत. या प्रकरणात राष्ट्रवादी काँग्रेसचे नेते आणि मंत्री नवाब मलिक यांनी वानखेडे यांच्यावर सातत्याने वेगवेगळ्या प्रकारचे आरोप सुरुच ठेवले आहेत. मलिक यांनी समीर वानखेडे यांच्यावर बोगस जात प्रमाणपत्र दाखवून नोकरी लाटल्याचा आरोप केला आहे. तसेच त्यांनी वानखेडेंचे बर्थ सर्टिफिकेट, त्यांच्या पहिल्या लग्नाचे फोटो, निकाहनामा, त्यांचे काही कौटुंबिक फोटो प्रसिद्ध केले आहेत.

मात्र आता मलिक यांना हेच आरोप भोवण्याची शक्यता आहे. कारण समीर वानखेडे यांची बहिण यास्मिन वानखेडे (Yasmin Wankhede) यांनी या प्रकरणी राष्ट्रीय महिला आयोगाकडे धाव घेतली आहे. तसेच मलिकांविरोधात ओशिवरा पोलीस ठाण्यात तक्रारही दाखल केली आहे. एका महिलेच्या मुलभूत अधिकारांचे रक्षण करण्याची मागणी यास्मिन यांनी पत्र लिहून राष्ट्रीय महिला आयोगाकडे केली आहे. एका नोकरदार माणसाच्या जन्म प्रमाणपत्राबाबत शोध घेणारे नवाब मलिक कोण आहेत? त्यांची रिसर्च टीम दुबईपासून मुंबईपर्यंत आमचे फोटो पोस्ट करत आहेत. मलिकांनी खोटे आरोप करत आमची बदनामी केली असून आम्हाला जीवे मारण्याच्या धमक्या येत आहे असे आरोप यास्मिन यांनी केले आहेत.

तर राजीनामा देईन, मलिकांचे आव्हान.

मी केलेले सर्टिफिकेटचे आरोप खोटे ठरले तर राजीनामा देवून राजकारणातून संन्यास घेईन, असे आव्हान पत्रकार परिषदेत बोलताना नवाब मलिक यांनी वानखेडे कुटुंबीयांना दिले आहे. सोबतच हे खोटे ठरले तर किमान त्यांनी तरी माफी मागावी. तशीही त्यांची नोकरी तर जाणारच आहे, असेही ते म्हणाले आहेत.