काँग्रेसला मोठा धक्का! थेट मोदींच्या उपस्थितीत माजी मंत्री करणार भाजपमध्ये प्रवेश

गुवाहाटी : काँग्रेसची (Congress) गळती सुरूच असून, आता पक्षाला आणखी धक्का बसण्याची चिन्हे आहेत. माजी मंत्री व तीन वेळा आमदार राहिलेल्या महिला नेत्या बिस्मिता गोगोई (Bismit Gogoi) या काँग्रेसला रामराम करण्याच्या तयारीत आहेत. त्या भाजपच्या (BJP) वाटेवर आहेत. त्यांनी नुकतीच मुख्यमंत्री हिमंता बिस्वा सरमा यांची गुप्तपणे भेट घेतली आहे.

बिस्मिता गोगोई यांच्या पक्षप्रवेश थेट पंतप्रधान नरेंद्र मोदी (Narendra Modi) यांच्या उपस्थितीत होणार आहे. मोदी हे दिब्रुगड येथे भेट देणार असून, सात नवीन कर्करोग रुग्णालयांचे उद्घाटन करणार आहेत. गोगोईंच्या पक्षप्रवेशासाठी हा मुहूर्त निवडण्यात आला आहे. गोगोई या खुमताई मतदारसंघातील माजी आमदार आहेत. त्यांनी नुकतीच मुख्यमंत्री सरमा यांची भेट घेऊन भाजपमध्ये प्रवेश करण्याची इच्छा व्यक्त केली होती, अशी माहिती सूत्रांनी दिली.

बिस्मिता गोगोई या आधी काँग्रेसच्या सरकारच्या काळात मंत्री होत्या. त्यांनी सांस्कृतिक, हस्तोद्योग, वस्त्रोद्योग, मधुमक्षिकापालन आणि मागास वर्ग कल्याण या मंत्रालयाची धुरा सांभाळली होती. नंतर त्यांची अखिल भारतीय महिला काँग्रेसच्या सरचिटणीसपदी निवड करण्यात आली होती. बिस्मिता या आसामचे माजी विधानसभा अध्यक्ष दिवंगत काँग्रेस नेते जिबा कांता गोगोई यांच्या स्नुषा आहेत. त्यांच्या भाजप प्रवेशाने काँग्रेसला मोठा धक्का बसणार आहे.

नुकतीच काँग्रेसचे माजी प्रदेशाध्यक्ष व माजी खासदार रिपुन बोरा (Ripun Bora) यांनी पक्षाला सोडचिठ्ठी दिली. राज्यातील पक्षांतर्गत वादावर बोट ठेवत त्यांनी पक्ष सोडला. त्यानंतर काही तासांतच पश्चिम बंगालच्या मुख्यमंत्री ममता बॅनर्जी (Mamata Banerjee) यांनी त्यांना गळाला लावले. बोरा यांनी तृणमूल काँग्रेसमध्ये (TMC) प्रवेश केला आहे. बोरा हे राज्यसभेचे खासदार होते. त्यांची मुदत संपल्यानंतर त्यांना काँग्रेसकडून पुन्हा संधी देण्यात आली होती. या निवडणुकीत त्यांचा पराभव झाला होता. काँग्रेस आमदारांनी जाणीवपूर्वक मतदानात चूक केल्याने हा पराभव झाला होता.