Himani Murder : 'अत्याचार, मारहाण आणि अंमली पदार्थ', हिमानीच्या पोस्टमॉर्टममध्ये धक्कादायक खुलासा

Rohtak News : हरियाणातील रोहतक येथील काँग्रेस नेत्या हिमानी नरवाल यांची हत्या त्यांच्याच घरात करण्यात आल्याचे आता उघड झाले आहे. ही माहिती तिच्या पोस्टमॉर्टममध्ये समोर आली आहे. तर धक्कादायक बाब म्हणजे तिच्यावर अत्याचार झाल्या असल्याची शक्यता आहे. तर तिला जबर मारहाण करण्यात आल्याचेही आता उघड झाले आहे. तथापि, व्हिसेरा आणि इतर नमुने मधुबन एफएसएल प्रयोगशाळेत पाठवण्यात आले आहेत. या हत्येप्रकरणी एका तरुणाला अटक केली. ज्याचे नाव सचिन असून तो बहादूरगडचा रहिवासी आहे.

दोनच दिवसांपूर्वी (ता.1 मार्च) सकाळी रोहतक येथील सांपला शहरातील बस स्टँडजवळ एका बेवारस सुटकेसमध्ये तिचा मृतदेह सापडला होता. तर तिचा हात सुटकेसमधून बाहेर आल्याने रस्त्याने जाणाऱ्यांना ते दिसले. यानंतर त्यांनी याची माहिती पोलिसांना दिली होती. पेलिसांनी तात्काळ घटनास्थळी जाऊन तपास केला होता. त्यावेळी हा मृतदेह दुसऱ्या तिसऱ्या कोणाचा नसून काँग्रेस नेत्या हिमानी नरवालचा असल्याचे समोर आले होते. यामुळे एकच खळबळ उडाली होती.

(२५ वर्षे पूर्ण करणारा ई-सकाळ आता कॉमस्कोअरमध्ये नंबर १. डिजिटल माध्यमांच्या क्षेत्रातली नवी झेप)

हिमानी नरवाल या काँग्रेसच्या सक्रिय कार्यकर्ता होत्या. त्या पक्षाच्या प्रत्येक मोठ्या कार्यक्रमात सहभागी होत असत. काँग्रेस नेते राहुल गांध यांनी काढलेल्या 'भारत जोडो यात्रे' देखील त्या सहभागी झाल्या होत्या. यावेळी राहुल गांध यांच्याबरोबरचा त्यांचा फोटो चांगलाच व्हायरल झाला होता.दरम्यान आता तिच्या हत्येनंतर काँग्रेस चांगलीच आक्रमक झाली असून आमदार बीबी बत्रा यांनी एसआयटी चौकशीची मागणी केली आहे.

काँग्रेस नेत्या हिमानी नरवाल यांच्या हत्येनंतर, त्यांच्या कुटुंबाने तिचा मृतदेह घेण्यास नकार दिला होता. तर आरोपींना अटक करण्याची मागणी केली होती. तसेच काँग्रेस जर हमी देत असेल तरच आपण मृतदेह अंत्यसंस्कारासाठी ताब्यात घेऊ अशी भूमीका घेतली होती. तर पोलिसांनी हिमानीच्या कुटुंबीयांची समजूत काढण्याचा प्रयत्न केला होता. मात्र त्यांना यश आले नव्हते. यादरम्यान पोलिसांनी एकास दिल्लीतून अटक केली आहे.

अटक केलेल्या सचिन हिमानीचा ओळखीचा असून तो हिमानीच्या रिलेशनशिपमध्ये असल्याचा दावा त्याने केला आहे. तसेच त्याच्या झडतीत पोलिसांना हिमानीचा मोबाईल फोनही मिळाला असून तो जप्त करण्यात आला आहे. या प्रकरणावरून सध्या राजकीय दबाव वाढत असल्याने पोलिसांनी डीएसपीच्या नेतृत्वाखाली एसआयटी स्थापन केली आहे. जे आता 100 हून अधिक सीसीटीव्ही कॅमेऱ्यांचे फुटेज स्कॅन केले आहे.

प्राथमिक शवविच्छेदन तपासणीच्या अहवालानुसार हिमानीचा मृत्यू गळा दाबून झाल्याचे उघड झाले आहे. तसेच सुटकेसमध्ये ठेवताना हिमानीचे हात आणि पाय मोडले होते. तिच्या तोंडात आणि नाकात रक्ताचे गुठळे झाले होते. हत्येपूर्वी तिला अंमली पदार्थ देण्यात आल्याची शक्यता व्यक्त करण्यात आली असून बलात्काराचीही अद्याप पुष्टी झालेली नाही. तथापि, व्हिसेरा आणि इतर नमुने मधुबन एफएसएल प्रयोगशाळेत पाठवण्यात आले आहेत.

आरोपीचा दावा

आतापर्यंत मिळालेल्या माहितीनुसार, आरोपीने असा दावा केला आहे की तो हिमानीसोबत रिलेशनशिपमध्ये होता. तसेच तो आणि ती त्याला ब्लॅकमेल करत होती. शिवाय, लाखो रुपयेही उकळण्यात आले होते. या संपूर्ण प्रकरणाचा तपास सध्या सुरू असून आरोपीची चौकशी सुरू असल्याचे पोलिसांनी म्हटलं आहे. तर तपासानंतरच हत्येमागील खरे कारण समोर येणार आहे.