काँग्रेसचा आमदार घसरला कंगनाच्या गालावर अन् व्हिडीओ झाला व्हायरल!

नवी दिल्ली : शिवसेनेचे मंत्री गुलाबराव पाटील यांना आपल्या मतदारसंघातील रस्ते हेमा मालिनी (Hema Malini) यांच्या गालासारखे आहेत, असे वक्तव्य केल्याने गदारोळ उडाला होता. आता काँग्रेसच्या (Congress) आमदाराने मतदारसंघातील रस्ते कंगना राणावतच्या (Kangana Ranaut) गालासारखे गुळगुळीत करून दाखवण्याचे आश्वासन जाहीरपणे दिले आहे. याचा व्हिडीओ व्हायरल झाला असून, यावरून वाद निर्माण झाला आहे.

खूप वर्षांपूर्वी बिहारचे माजी मुख्यमंत्री लालूप्रसाद यादव (Lalu prasad yadav) बिहारमधील रस्ते हेमा मालिनी यांच्या गालासारखे असल्याचे म्हणत होते. मात्र, त्यांचीच स्टाईल मारत अनेक नेत्यांनी रस्त्यांची तुलना हेमा मालिनी यांच्या गालाशी करण्याची परंपरा कायम ठेवली होती. यात नुकतीच गुलाबराव पाटील यांची भर पडली होती. या प्रकरणी पाटील यांनी अखेर माफी मागावी लागली होती.

आता काँग्रेस आमदाराने रस्त्यांसाठी हेमा मालिनी यांच्याऐवजी कंगना राणावतच्या गालाची उपमा देऊन नवीन वाद ओढवून घेतला आहे. झारखंडमधील जमताराचे आमदार डॉ.इरफान अन्सारी यांनी हे वक्तव्य केले आहे. त्यांनी म्हटले आहे की, जमतारामधील रस्ते चित्रपट अभिनेत्री कंगना राणावतच्या गालापेक्षा मी गुळगुळीत करून दाखवेन. लवकरच मतदारसंघात जागतिक दर्जाचे 14 रस्ते बनवण्यात येतील.

गुलाबराव पाटील यांनी नुकतीच बोदवड नगरपंचायत प्रचार भरसभेत बोलताना हेमा मालिंनीबाबत वक्तव्य केले होते. गेली ३० वर्षे या भागातले आमदार आहेत. पण ते साधे रस्ते चांगले करू शकले नाहीत. माझ्या धरणगाव मतदारसंघात या आणि बघा हेमा मालिनी यांच्या गालासारखे सुंदर रस्ते आम्ही केले आहेत, असे पाटीला म्हणाले होते. या वक्तव्याची क्लिप व्हायरल झाल्यानंतर गुलाबराव पाटील चांगलेच वादात सापडले होते. या प्रकरणी अखेर माफीनामा सादर करून पाटील यांनी वादावर पडदा टाकला होता.