राजकारण तापलं! आमदार जिग्नेश मेवानींना जामीन अन् लगेचच पुन्हा अटक

गुवाहाटी : गुजरातमधील (Gujrat) काँग्रेसचे (Congress) आमदार जिग्नेश मेवानी (jignesh Mevani) यांना आज न्यायालयानं मोठा दिलासा दिला आहे. त्यांना न्यायालयाने जामीन मंजूर केली आहे. पंतप्रधान नरेंद्र मोदींबद्दल वादग्रस्त ट्विट केल्याप्रकरणी आसाम पोलिसांनी (Assam Police) ही कारवाई केली होती. जामीन मिळाल्यानंतर लगेचच मेवानी यांना पुन्हा अटक कऱण्यात आली आहे. त्यांना आता दुसऱ्या गुन्ह्यात आसाम पोलिसांनी अटक केली आहे. मेवानींना नेमंक कोणत्या गुन्ह्यात अटक केली हे पोलिसांनी अद्याप सांगितलेलं नाही. यामुळं राजकारण तापलं आहे.

या प्रकरणी भाजपच्या (BJP) एका स्थानिक नेत्यानं पोलिसांकडे तक्रार दिली होती. जामीन मिळाल्यानंतर मेवानी यांनी भाजप आणि राष्ट्रीय स्वयंसेवक संघावर हल्लाबोल केला आहे. ते म्हणाले की, हा तर भाजप आणि राष्ट्रीय स्वयंसेवक संघाचा कट होता. माझी प्रतिमा मलिन करण्याच्या त्यांचा प्रयत्न आहे. ते पद्धतशीरपणे यासाठी पावले उचलत आहेत. आधी त्यांनी रोहित वेमुलाच्या बाबतीत हेच केलं होतं. नंतर चंद्रशेखर आझाद आणि माझ्याबाबतही हेच घडतं आहे. पंतप्रधान कार्यालयातून सुडाचं राजकारण सुरू आहे.

आसाममधील कोक्राझार येथील स्थानिक भाजप नेत्यानं मेवानी यांच्या विरोधात पोलिसांकडे तक्रार दिली होती. धार्मिक भावना दुखावना, धार्मिक तेढ निर्माण करणे, असे आरोप मेवानी यांच्यावर करण्यात आले आहेत. अखेर या प्रकरणी न्यायालयानं मेवानी यांना जामीन मंजूर केला आहे. आसाममध्ये पोलिसांनी तक्रार दाखल केल्यानंतर 24 तासांतच मेवानी यांना अटक झाली होती. गुजरातची आगामी विधानसभा निवडणूक डोळ्यासमोर ठेवून ही कारवाई झाल्याचा दावा काँग्रेसनं केला होता. वडगाममधील पालनपूर सर्किट हाऊसमध्ये मेवानी यांना 21 एप्रिलला आसाम पोलिसांनी अटक केली होती. त्या रात्रीच त्यांना अहमदाबाद येथे नेण्यात आले होते. तिथून रेल्वेने त्यांना आसाममध्ये गुवाहाटीला नेण्यात आले होते.