नेहरू-गांधींच्या नावावर आम्ही तीन पिढ्या बसून खातील एवढं कमावलं! काँग्रेस आमदाराची कबुली

बेंगलुरू : वादग्रस्त वक्तव्यांमुळे सतत वादात अडकणारे काँग्रेसचे आमदार आणि कर्नाटक (Karnataka) विधानसभेचे माजी अध्यक्ष के. आर. रमेश कुमार यांनी पुन्हा वाद निर्माण केला आहे. काँग्रेसच्या नेत्यांनी नेहरू आणि गांधी यांच्या नावावर खुप कमावलं आहे. आमच्या तीन-चार पिढ्यांसाठी ते खूप आहे, असं वक्तव्य केलं आहे. (Congress Latest Marathi News)

काँग्रेस अध्यक्ष सोनिया गांधी (Sonia Gandhi) यांच्या ईडी चौकशीविरोधात बेंगलुरू येथे गुरूवारी पक्षाकडून आंदोलन करण्यात आले. यावेळी बोलताना रमेश कुमार यांनी हे वादग्रस्त वक्तव्य केलं आहे. ते म्हणाले, आम्ही नेहरू, इंदिरा गांधी आणि सोनिया गांधी यांच्या नावावर एवढी संपत्ती कमावली आहे की जी तीन ते चार पिढ्यांना पुरेल. आज आम्ही बलिदान दिलं नाही तर भविष्यात आम्ही कमवलेलं सडून जाईल.

पक्षातील कार्यकर्त्यांनी पक्षातून छोटे-छोटे मुद्दे सोडून काँग्रेस आणि सोनिया गांधी यांना मजबूत करण्यासाठी काम करायला हवे, असंही रमेश कुमार म्हणाले आहेत. यावरून आता भाजपकडून काँग्रेसवर जोरदार निशाणा साधला जाऊ शकतो. भाजपकडून काँग्रेसवर सतत भ्रष्टाचाराचे आरोप केले जातात. याप्रकरणात काँग्रेसचे नेतेही कुमार यांच्या पाठिशी उभे राहणार नाहीत, अशी शक्यता आहे.

दरम्यान, रमेश कुमार यांनी यापूर्वीही अनेकदा वादग्रस्त विधानं केली आहेत. डिसेंबर महिन्यात राज्य विधानसभेत शेतकऱ्यांच्या मुद्यावर चर्चेदरम्यान अध्यक्ष विश्वेश्वर हेगडे यांनी वेळेत कमी असल्याने प्रत्येकाला बोलण्यासाठी वेळे नियोजन कसं करता येईल, असा प्रश्न विचारला होता. तुम्ही जे निश्चित कराल त्याला मी हो म्हणेन. मी जो विचार करतोय ते हे आहे की, आपण या स्थितीचा आनंद घ्यावा, असं ते म्हणाले होते.

त्यावर बोलताना रमेश कुमारे यांनी वादग्रस्त वक्तव्य केले होते. ते म्हणाले होते की, 'एक म्हण आहे, जेव्हा बलात्कार होणारच असतो तेव्हा झोपा आणि त्याचा आनंद घ्या. अशीच तुमची अवस्था झाली आहे.' त्यानंतर त्यांच्यावर जोरदार टीका झाली होती.