WFI Chief Sanjay Singh: मोठी बातमी! कुस्ती महासंघाची मान्यता रद्द; नवनिर्वाचित अध्यक्ष संजय सिंहांचही निलंबन

Delhi News: केंद्रीय क्रीडा मंत्रालयाकडून नव्या राष्ट्रीय कुस्ती महासंघाची मान्यता रद्द करण्यात आली आहे. याबरोबरच कुस्ती महासंघाचे नवे अध्यक्ष म्हणून निवड झालेले संजय सिंह यांचेही निलंबन करण्यात आले आहे. केंद्रीय क्रीडा मंत्रालयाने हा मोठा निर्णय घेतला आहे.

भारतीय कुस्ती महासंघाच्या अध्यक्षपदाच्या निवडणुका काही दिवसांपूर्वीच पार पडल्या होत्या. यामध्ये भाजप खासदार ब्रिजभूषण सिंह यांचे निकटवर्तीय मानले जाणारे संजय सिंह यांची निवड झाली होती. मात्र, संजय सिंहांची कुस्ती महासंघाच्या अध्यक्षपदी निवड झाल्यानंतर कुस्तीपटू साक्षी मलिकने कुस्तीतून निवृत्ती जाहीर केली होती.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

तसेच कुस्तीगीर आणि ऑलिम्पिक पदक विजेता बजरंग पुनिया याने आपले पद्म पुरस्कार परत केले. यामुळे मोदी सरकारवर जोरदार टीका झाली. यानंतर अखेर मोदी सरकारला जाग आली आणि मोठा निर्णय घेत थेट नव्या कुस्ती महासंघाची मान्यता रद्द करण्याचा निर्णयच सरकारने घेतला. तसेच संजय सिंह यांनी घेतलेल्या सर्व निर्णयांना स्थगितीही देण्याचा निर्णय घेतला आहे.

याबरोबरच पुढील आदेश येईपर्यंत सर्व कामांवर बंदी घालण्यात आली असून कुस्ती संघटनेची ही निवडणूक वैध नसल्याचं कारण सरकारकडून देण्यात आलं आहे. दरम्यान, ही कारवाई करण्यात आल्यामुळे भाजप खासदार ब्रिजभूषण सिंह आणि संजय सिंह यांना मोठा धक्का बसला आहे.

(Edited By - Ganesh Thombare)