US Iran conflict : इराणसह संपूर्ण जगासाठी पुढचे 10 दिवस महत्वाचे! ट्रम्प यांचा प्लॅन फसला तर मोठा धमाका...

Strait of Hormuz Crisis Delay : अमेरिकेचे राष्ट्राध्यक्ष डोनाल्ड ट्रम्प यांनी 22 मार्च रोजी होर्मुझची सामुद्रधुनी 48 तासांत खुली न केल्यास इराणच्या ऊर्जा पायाभूत सुविधांवर हल्ला करण्याचा इशारा दिला होता. मात्र त्यानंतर दुसऱ्याच दिवशी ट्रम्प यांनी हा हल्ला 5 दिवसांसाठी स्थगित केला होता.

त्यानंतर आता पुन्हा एकदा ट्रम्प यांनी हे हल्ले 10 दिवसांसाठी स्थगित करत असल्याची घोषणा केली आहे. मात्र, यावेळी ट्रम्प यांनी इराणने केलेल्या विनंतीनंतर त्यांच्या ऊर्जेशी संबंधित पायाभूत सुविधांवरील हल्ले 10 दिवसांसाठी स्थगित करत असल्याचा दावा केला आहे.

ट्रम्प यांच्या या घोषणेमुळे आता इराण आणि अमेरिकेत सुरू असलेला संघर्ष थांबवण्यासाठी राजनैतिक चर्चा होण्याची शक्यता वर्तवली जात आहे. डोनाल्ड ट्रम्प यांनी ट्रूथ या सोशल मीडियावर एक पोस्ट शेअर केली आहे.

ज्यामध्ये त्यांनी म्हटलंय की, 'इराण सरकारने केलेल्या विनंतीनुसार, मी ऊर्जा प्रकल्प उद्ध्वस्त करण्याचा कालावधी आणखी 10 दिवसांसाठी म्हणजेच सोमवार, 6 एप्रिल 2026 रात्री 8 वाजेपर्यंत, ईस्टर्न टाईम स्थगित करत आहे. चर्चा चांगल्या प्रकारे सुरू आहे.' त्यांच्या या पोस्टमुळे आता या दोन्ही देशांमध्ये संघर्ष थांबवण्याबाबत चर्चा होणार का हे पाहणं महत्त्वाचं ठरणार आहे.

शिवाय ट्रम्प यांनी इराणने विनंती केल्याचा दावा केला असला तरी इराणकडून अद्याप याबाबत काही प्रतिक्रिया समोर आलेली नाही. दरम्यान, अमेरिकेने केलेल्या हल्ल्यांना इराण देखील प्रत्युत्तर देत आहे. इराणकडून प्रदेशात ड्रोन आणि क्षेपणास्त्र हल्ले केले जात आहेत.

ज्यामध्ये अमेरिकेचे लष्करी तळ आणि इतर पायाभूत सुविधांना लक्ष्य केलं आहे. ज्यामुळे या दोन्ही देशांमधील तणाव आणखी वाढला होता. अशातच ट्रम्प यांनी हल्ले 10 दिवस थांबवल्याची घोषणा केल्यामुळे चर्चेतून मार्ग निघणार का आणि हे युद्ध थांबणार का? याकडे संपूर्ण जगाचं लक्ष लागलं आहे.