Pooja Khedkar : पूजा खेडकर यांनी आता टोक गाठलं; कोर्टात UPSC लाच ठरवलं खोटारडं

New Delhi : माजी आयएएस ट्रेनी अधिकारी पूजा खेडकर यांनी केंद्रीय लोकसेवा आयोगाचे सर्व आरोप फेटाळून लावले आहेत. खेडकर यांनी UPSC खोटं बोलत असल्याचे प्रतिज्ञापत्र कोर्टात सादर केले आहे. आपली निवड रद्द करण्याचे कोणतेही अधिकारी आयोगाकडे नसल्याचा दावाही त्यांनी केला आहे.

यूपीएससीने खेडकर यांच्याविरोधात दिल्ली पोलिसांत फसवणुकीची तक्रार दिली आहे. त्यानुसार गुन्हाही दाखल करण्यात आला असून त्यांच्यावर अटकेची टांगती तलवार आहे. अटक टाळण्यासाठी त्यांनी दिल्ली हायकोर्टात धाव घेतली आहे. कोर्टात पूजा यांनी आपले उत्तर सादर केले आहे. परविक्षाधीन अधिकारी म्हणून निवड आणि नियुक्ती केल्यानंतर निवड अयोग्य घोषित करण्याचे यूपीएससीचे अधिकार संपुष्टात येतात, असा मोठा दावा खेडकर यांनी केला आहे.

खेडकर यांनी आपण नावात बदल केला नसल्याच दावा करताना म्हटले आहे की, 2012 ते 2022 या कालावधीत आपण नावात कोणताही बदल केलेला नाही. तसेच यूपीएससीलाही चुकीची माहिती दिलेली नाही. आयोगाने बायोमेट्रिक डेटाच्या माध्यमातून माझी माहिती पडताळली. त्यामध्ये माझी कोणतीही कागदपत्रे बनावट असल्याचे आढळले नाही.

माझे शैक्षणिक प्रमाणपत्र, आधार कार्ड, जन्मतिथी आणि वैयक्तिक माहिती तसेच इतर माहितीही सुसंगत आहे. यूपीएससीने 2019, 2021 आणि 2022 मध्ये पर्सनलिटी टेस्टदरम्यान एकत्रित केलेल्या बायोमेट्रिक डेटाच्या माध्यमातून माझी ओळख पटवली आहे. त्यानंतर 26 मे 2022 मध्येही आयोगाने कागदपत्रांवर शिक्कामोर्तब केले होते, अशी माहिती खेडकर यांनी कोर्टात दिली आहे.

मी माझे नाव आणि प्रमाणपत्रांमधील विसंगती दूर करण्यासाठी तसे हमीपत्र आणि अधिकृत राजपत्रही सादर केले होते. पीडब्ल्यूबीडी, जात आणि वडिलांच्या नावाबाबत यूपीएससीच्या निर्देशांचे पालन केले. त्यामुळे मी माझे नाव चुकीचे सांगितल्याचे आयोगाचे म्हणणे चुकीचे असल्याचे खेडकर यांनी म्हटले आहे.  दरम्यान, हायकोर्टात खेडकर यांच्या अटकपूर्व जामीनाच्या याचिकेवर गुरूवारी सुनावणी होण्याची शक्यता आहे.