Srinagar terror operation : मोठी बातमी : संसदेत ऑपरेशन सिंदूरवर चर्चा सुरू असतानाच 3 दहशतवाद्यांना कंठस्नान

Pahalgam terror link : पहलगाम दहशतवादी हल्ला करणारे दहशतवादी अद्यापपर्यंत लष्कराच्या हाती लागले नसल्याचे केंद्र सरकारकडूनही कबुल केले जात होते. पण सोमवारी संसदेत ऑपरेशन सिंदूरवर चर्चेला सुरूवात असतानाच लष्कराला मोठं यश मिळाले आहे. श्रीनगरमध्ये आज लष्कर आणि दहशतवाद्यांमध्ये जोरदार धुमश्चक्री झाली असून त्यात तीन दहशतवाद्यांचा खात्मा झाला आहे.

लष्कराने यमसदनी पाठवलेले तीन दहशतवाद्यांचे पहलगाम हल्ल्याशी कनेक्शन असू शकते, असे वृत्त आहे. लष्कराच्या ‘ऑपरेशन महादेव’अंतर्गत हे यश मिळाले आहे. श्रीनगर जिल्ह्यातील लिदवास जंगलांमध्ये ही कारवाई करण्यात आली आहे.

लष्कर ए तोयबाचा टॉपचा कमांडर सुलेमान शाह उर्फ मुसा फौजी याने पहलगामचे षडयंत्र रचले होते. हाही या चकमकीत मारला गेला आहे. तसेच यासिर आणि हामजा हा दोघांचाही खात्मा करण्यात आला आहे. या तिघांपैकी मुसा आणि यासिर हा दोघांचा पहलगाम दहशतवादी हल्ल्यात सहभाग असल्याचे धागेदोरे हाती लागल्याचे वृत्त आहे.

काही दिवसांपूर्वी एनआयएने दोन जणांना अटक केली होती. त्यांनी दिलेल्या माहितीनुसार हे ऑपरेशन राबविण्यात आले. लष्कराकडून अद्याप याबाबत अधिकृतपणे कोणतीही माहिती देण्यात आलेली नाही. दरम्यान, पहलगाममध्ये 22 एप्रिल रोजी दहशतवाद्यांनी पर्यटकांवर हल्ला केला होता.

हल्ल्यात 26 पर्यटकांचा मृत्यू झाला होता. पर्यटकांना धर्म विचारून त्यांच्यावर गोळ्या झाडण्यात आल्या होत्या. मृत्यू झालेल्यांमध्ये बहुतेक जण हिंदू होते. सुरूवातीला या हल्ल्याची जबाबदारी द रेझिस्टंस फ्रंट या संघटनेने घेतली होती. पण नंतर या संघटनेने हल्ला केला नसल्याचे सांगितले होते.